Við krefjumst réttlætis!    

Nú í aðdraganda samningaviðræðna um kjarasamninga á vinnumarkaði  vaknar eðlilega spurningin um félagslegt réttlæti í landinu. Kjarasamningar eru í eðli sínu tæki til að bæta lífskjör og jafna kjör í þjóðfélaginu.

Á einu vetfangi haustið 2008 breyttust kjör á Íslandi úr því að vera bærileg í það að verða óþolandi. Kaupmáttur féll eins og steinn í vatni, lán almennings í landinu hækkuðu mánuð eftir mánuð þannig að fólk horfði á eignir sínar brenna upp í verðbólgu sem engu eirði. Stjórnvöld stóðu vörð um sparifé landsmanna en hugsuðu minna um hina sem horfðu á eftir íbúðum sínum og húseignum í eld verðbólgunnar. Fjöldi manna sem bar ábyrgð á hruninu og tókst að komast undan með kúlulán og jafnvel hundruða milljóna hagnað í bankaviðskiptum er ennþá frjálst ferða sinna.

Tökum vel á móti Gallup!

Viðhorf félagsmanna í forgrunni

Á undanförnum vikum hafa Efling, Hlíf ogVSFK undirbúið Gallup könnun félaganna sem að þessu sinni er mikilvægari en oft áður vegna  kjarasamninganna í haust. Leitað er eftir gagnlegum upplýsingum og viðhorfum félagsmanna til þess að geta betur mótað og byggt upp ýmis atriði við kröfugerð félaganna í samningunum. Þetta á meðal annars við um breytingar á tekjum, afkomu þeirra sem lent hafa í atvinnuleysi og fjárhagsstöðu heimilanna. Það er því afar brýnt að ná til sem flestra af 3000 manna úrtaki félagsmanna sem fá erindi um að taka þátt í þessu verkefni. Veglegir vinningar eru í happdrættispotti sem allir fara sjálfkrafa í sem taka þátt í könnuninni.

Vestmannaeyjar – íbúð

Tekin hefur verið ákvörðun um að halda áfram að leigja íbúðina í Vestmannaeyjum. Þeir sem voru í íbúðinni í sumar lýstu yfir mikilli ánægju með hana og svo eru samgöngur til Eyja orðnar til fyrirmyndar. Íbúðin er á annarri  hæð í fjölbýli. Í íbúðinni eru tvö svefnherbergi, en gistirými fyrir 6 manns.

Endilega ef þið hafið hugsað ykkur að skoða Eyjarnar fögru hafið samband við skrifstofu í síma 510 7500 og pantið í tíma.“

Vetrarleiga sumarhúsa/íbúða

Mánudaginn 16. ágúst byrjum við að bóka í sumarhús og íbúðir félagsins 6 mánuði fram í tímann og vetrarleiga hefst 27. ágúst
Endilega hafið samband í síma 510 7500 eða komið á skrifstofu félagsins að Sætúni 1, 105 Reykjavík.

Skoðar þú launaseðilinn þinn?

Skoðar þú launaseðilinn þinn vel þegar þú tekur við honum um hver mánaðamót. Það er nú mikilvægara en oft áður að temja sér að skoða launaseðilinn vel og fara vel yfir þær upplýsingar sem þar eru til að tryggja að farið sé eftir kjarasamningi, ráðningarsamningum og lögum. Launaseðlar geta verið mismunandi í uppsetningu eftir fyrirtækjum og stofnunum en þar eru lykilatriði sem ætíð eiga að vera í lagi.

Mikilvægt er að allar greiðslur séu sundurliðaðar og skýr skil á milli dagvinnu, yfirvinnu og vinnu á stórhátíðisdögum. Þá er mikilvægt að frádráttarliðir séu vel afmarkaðir og sundurliðaðir. Einnig ber atvinnurekanda að sýna uppsafnað orlof og frítökurétt ef um hann er að ræða.

Hefur RSK ekki áhuga á skattsvikum?

Efling-stéttarfélag fær iðulega inná borð til sín upplýsingar um vinnustaði þar sem launaseðlar eru ekki afhentir við útborgun, ekki er greitt af nokkrum manni í lífeyrissjóði eða félagsgjald og starfsmenn eru kallaðir verktakar. Oft er um að ræða veitingastaði þar sem ungt fólk er við störf og eru nokkur dæmi um slíkt á liðnum mánuðum. Haft hefur verið samband við ríkisskattstjóra í þessum tilvikum en þaðan koma engin viðbrögð og fyrirtækið heldur áfram óbreyttum rekstri.

Borgar sig

Að vera í stéttarfélagi

Mikill réttindamunur á launamanni og verktaka

Nýverið var NordicaSpa ehf. úrskurðað gjaldþrota. Við þetta gjaldþrot og ýmis önnur á undanförnum misserum hefur komið í ljós hve mikilvægt það er að vera launamaður í stéttarfélagi en ekki verktaki á vinnustað.  Gjaldþrotahrina hefur gengið yfir síðustu tvö ár og ekki er að sjá að það sé á enda. Munurinn er sá að eftir gjaldþrot fá félagsmenn stéttarfélaganna laun sín þó síðar verði, stéttarfélag þeirra ver hagsmuni þeirra gagnvart þrotabúi og Ábyrgðarsjóði launa.

Hversu hratt skal hlaupa?

Ræstingafólk flæmt frá störfum

...í lok starfsferils síns

Til skrifstofu Eflingar-stéttarfélags hefur í auknum mæli leitað fólk og starfsmenn fengið ábendingar þess efnis að verið sé að stilla fólki upp við vegg með að auka vinnuafköst sín fyrir sömu laun og áður. Vinnufyrirkomulagi er breytt, ræstingafólki gert að taka mun stærri svæði en áður en ræsta sjaldnar hvert svæði. Þá kemur upp sú spurning hvað viðkomandi á að komast yfir stórt svæði á umsömdum tíma. Svarið er að miðað sé við að vinna á eðlilegum vinnuhraða og að tekið sé tillit til umsaminna neysluhléa. Þá kemur oftar en ekki ágreiningur um hvað geti talist eðlilegur vinnuhraði...

Frekari sameining félaga á döfinni?

Efling fær heimild til samningaviðræðna

Aðalfundur Eflingar-stéttarfélags haldinn 29. apríl 2010 veitir stjórn félagsins heimild til að ganga til sameiningarviðræðna við Verkalýðs- og sjómannafélag Keflavíkur og nágrennis og Verkalýðsfélagið Hlíf í Hafnarfirði. Jafnframt er heimilt að ganga til viðræðna við önnur félög á svæðinu óski þau eftir viðræðum.  Niðurstöður viðræðna verði lagðar fyrir trúnaðarráð og félagsfund í Eflingu þegar þær liggja fyrir.

Aðalstyrkveiting Eflingar til SÁÁ

Mikilvægt starf með ungu fólki

- segir Sigurður Bessason

Þeir sem eru eldri hafa aukið drykkju sína mjög

Flestir þekkja starf SÁÁ í gegnum vinnufélaga, ættingja og vini sem hafa notið góðs af starfi samtakanna. Færri vita um afskaplega mikilvægt starf samtakanna með ungu fólki.  Sérstaklega má þjónustu sem er þannig að hægt er að hafa samband vegna ungs fólks í fíkniefnavanda og leita úrlausna með samtökunum, sagði Sigurður Bessason í stuttu ávarpi á aðalfundi Eflingar þegar hann afhenti Þórarni Tyrfingssyni, formanni SÁÁ aðalstyrk Eflingar á þessu ári. Þórarinn sagði að gott væri að eiga slíka bakhjarla sem Eflingu en alla tíð hefði SÁÁ átt góða að allt frá þjóðarvakningunni þegar samtökin voru stofnuð árið 1977.

Vel mætt á fundi með fólki í atvinnuleit

Í febrúar hóf Efling stéttarfélag að hafa markvisst samband við félagsmenn sína sem eru í atvinnuleit  og hefur nú haft samband við yfir 400 félagsmenn og haldið allmarga fundi og kynningar. Á fundunum hefur verið farið yfir ýmsa þjónustu félagsins og kosti sem bjóðast fólki í atvinnuleit. Fram kemur á fundunum að ánægja er með þetta framtak og er vel mætt á fundina.

Atvinnuleitendur hafa verið mjög ánægðir með þetta framtak félagsins hafa ýmis mál verið rædd á fundunum og mörg sjónarmið komið fram. Einnig hefur verið kannaður vilji þeirra til námskeiðshalds eða annarra úrræða sem félagið hefur möguleika á að bjóða upp á. Margir hafa í framhaldi farið og nýtt sér þau námsúrræði og námskeið sem í boði eru og pantað tíma hjá náms-og starfsráðgjafanum, sótt um styrki í fræðslusjóðnum og sjúkrasjóðnum. Er því full ástæða til að halda þessum fundum áfram og halda góðum tengslum við félagsmenn okkar sem eru í atvinnuleit.

Laun hækka frá 1. júní

Frá 1. júní 2010 hækka laun á almennum vinnumarkaði um 2,5% taki laun ekki mið af kauptöxtum.  En kauptaxtar hækka þá um 6.500 kr.

Hér er um að ræða síðasta áfangann í launahækkunum í núgildandi kjarasamningi SA og Eflingar sem er aðgengilegur á heimsíðu félagsins ásamt launatöxtum undir kjarmál.  Á síðasta ári hækkuðu launataxtar um 6.750 krónur þann 1. júlí 2009 og aftur þann 1. nóvember um sömu krónutölu kr. 6.750.  1. nóvember tók einnig 3,5% launaþróunartrygging gildi hjá þeim sem enga hækkun höfðu fengið frá 1. janúar 2009 og voru ekki á kauptaxta.  Ef um hækkanir á launum var að ræða á þessu tímabili þá drógust þær frá 3,5%.

Samningurinn gildir til 30. nóvember á þessu ári en þá eru einnig aðrir kjarasamningar Eflingar lausir svo sem við ríki, sveitarfélög, hjúkrunarheimili og Reykjavíkurborg.  Hliðstæð hækkun á launataxta gildir einnig frá 1. júní fyrir samninga Eflingar sem heyra undir opinbera samningssviðið en nánari upplýsingar má finna undir síðu kjaramála.

Við viljum vinnu

Við sem búum á Íslandi gerum okkur grein fyrir því að allt er breytingum háð. Við höfum öll fylgst með þeim náttúruhamförum sem að eiga sér stað undir Eyjafjöllum. Íslendingar vita að  þetta svæði er nánast allt virkt eldfjallasvæði með Eyjafjallajökul, Kötlu og Grímsvötnum  í Vatnajökli í aðalhlutverkum. Við fyllumst aðdáun á mikilfengleik náttúrunnar en verðum um leið meðvitaðri um ógnir eldgosanna. Viðbrögð fólksins sem á allt sitt undir náttúrunni eru aðdáunarverð. Engan bilbug er að finna þó að ævistarfið sé í húfi. Engin uppgjöf gagnvart þeim stórfelldu verkefnum sem eru framundan þó að útlitið sé svart. Hér koma bestu eiginleikar íslendinga í ljós.

1. maí ávarp Sigurrósar Kristindóttur varaformanns Eflingar stéttarfélags

Ágætu félagar

Til hamingju með daginn!

Dagurinn í dag er baráttudagur.  Í dag minnumst við þess að allt sem launafólk þessa lands hefur náð fram, er fyrir vinnu, fórnir og dugnað okkar sjálfra. Á þessari stundu þurfum við sjálf að endurmeta stöðuna eftir eitt erfiðasta ár í sögu okkar. Skýrsla rannsóknarnefndar  Alþingis  opnaði augu okkar endanlega fyrir sannleikanum.
Í landinu hefur þrifist spilling, spilling embættismanna, spilling stjórnmálamanna en síðast og ekki síst spilling í bankakerfi  og auðhringjum sem eiga stóran þátt í því hvernig komið er. Við skulum ekki gleyma því að í kjölfarið hrundi fjármálakerfið hér á Íslandi með þeim afleiðingum sem við nú stöndum frammi fyrir.
Siðferði þessa tíma leyfði milljónagjafir til stjórnmálamanna,   milljarða kúlulán til forsvarsmanna fjármálastofnana og stórfyrirtækja. Lán sem þeir ætluðu að græða á ef vel gengi en við verðum nú að borga, almenningur í landinu.

Hættur í forystu eftir 40 ár

Stoltur af verkalýðshreyfingunni

-segir Guðmundur Þ Jónsson

Ég vil þakka ykkur langa og ánægjulega samfylgd og er stoltur af hafa fengið að vera þátttakandi í störfum verkalýðshreyfingarinnar. Ég gleðst yfir góðum sigrum hennar og hef fylgst með því hvernig hún hefur styrkst og stækkað til að verða að öflugu þjóðfélagsafli. Þetta sagði Guðmundur Þ Jónsson þegar hann kvaddi félaga sína á fjölmennum aðalfundi Eflingar-stéttarfélags í gærkvöldi.

1. maí í Reykjavík

Sigurrós Kristinsdóttir varaformaður Eflingar er annar aðalræðumaður dagsins

Það verða konur sem bera hitann og þungann af baráttudeginum 1. maí að þessu sinni. Aðalræðumenn verða Sigurrós Kristinsdóttir, varaformaður Eflingar og Elín Björg Jónsdóttir, nýr formaður BSRB. Rannveig Sigurðardóttir, stjórnarmaður í VR stýrir fundinum sem að þessu sinni verður haldinn á Austurvelli  framan við alþingishúsið.
Safnast verður saman neðan við Hlemm á Laugavegi um kl. 13.00 en gangan leggur af stað kl. 13.30. Lúðrasveit verkalýðsins og Lúðrasveitin Svanur leika fyrir göngunni og einnig á Austurvelli.  Gengið verður niður Laugaveginn, Bankastræti, Austurstræti og inn á Austurvöll. Á Austurvelli verður haldinn baráttufundur. Fundurinn hefst kl. 14.10. og lýkur um kl. 15.00. Kakó og leiktæki verða í boði fyrir börnin  en fundinum lýkur um kl. 15.00.
Að loknum hátíðarhöldunum býður Efling – stéttarfélag upp á kaffi í Valsheimilinu á Hlíðarenda – Vodafone höllinni. Fyrir þá sem ekki eru vissir um hvar Valsheimilið er skal tekið fram að ekið er í áttina að Hótel Loftleiðum og beygt til hægri eftir vegaskilti sem sýnir Valsheimilið.
Fjölmennum í gönguna og tökum þátt í hátíðarhöldunum að öðru leyti. Njótum þess að fá okkur kaffi hjá Eflingu að hátíðarhöldunum loknum. Munum að þetta er dagurinn okkar.

Orlofshús

Fyrstur kemur fyrstur fær 30. apríl

Upplýsingar um laus orlofshús á fyrstur kemur fyrstur fær 30. apríl 2010 má nú finna á síðu orlofssjóðs.

Aðalfundur Eflingar-stéttarfélags

Aðalfundur Eflingar –stéttarfélags 2010 verður haldinn fimmtudaginn 29. apríl í sal Ferðafélags Íslands að Mörkinni 6. Fundurinn hefst kl. 20.00

Dagskrá:
1. Venjuleg aðalfundarstörf
2. Breyting á reglugerð Sjúkrasjóðs
3. Tillaga um sameiningarviðræður við Vlf. Hlíf í Hafnarfirði og VSFK í Keflavík
4. Önnur mál

Endurskoðaðir reikningar félagsins liggja frammi á skrifstofunni að Sætúni 1 frá og með föstudeginum 23.apríl nk..

Félagar mætið vel og stundvíslega.
Stjórn Eflingar-stéttarfélags

Úthlutun orlofshúsa sumarið 2010

Nú er lokið fyrstu úthlutun orlofshúsa og íbúða fyrir sumarið og eru umsækjendur að fá svarbréfin send heim þessa dagana. Viljum við minna þá sem fengu úthlutað á að greiðslufrestur er til 9. apríl  og mun önnur úthlutun fara fram 16. apríl. Það sem enn verður laust eftir það stendur félagsmönnum svo til boða í „Fyrstur kemur fyrstur fær“ 30. apríl n.k.

Mikil aukning varð á umsóknum eins og við var búist eða rúmlega 30% milli ára. Vegna þess  var framboð á húsum  aukið verulega eins og áður hefur komið fram. Þá hefur sala Veiði- og Útilegukortsins farið afar vel af stað og óhætt að segja að kortin mælist vel fyrir. Enda er um frábæra kosti að ræða á mjög góðu verði.

Ýtarlegar upplýsingar um orlofshús, íbúðir og annað sem í boði er finna félagsmenn í orlofsblaði Eflingar sem nýlega kom út.

 

Starfsmenn Loftorku nýta tímann til heilsueflingar

Upp úr áramótum varð ljóst að verkefnaskortur yrði hjá Loftorku í Reykjavík eftir áramót. Forsvarsmenn fyrirtækisins ákváðu í samráði við starfsmenn að nýta sér vinnumarkaðsúrræði og minnka starfshlutfall í 50% frekar en að beita uppsögnum. Þetta fyrirkomulag hefur reynst vel og núna vinna menn aðra hvora viku frá mánudegi til föstudags. Síðan eru þeir á atvinnuleysisbótum hina vikuna. Þegar skammt var liðið á þetta fyrirkomulag fóru menn að velta fyrir sér hvort ekki væri hægt að nýta tímann til uppbyggilegra verka frekar en að sitja heima. Umræðan varð til þess að óskað var eftir fundi með fulltrúum Eflingar og Starfsafls til að ræða málið. Eftir fjörugar umræður var ákveðið að bjóða uppá námskeið um vistakstur og heilsueflingu.