Laus íbúð á Akureyri

Það er laus íbúð á Akureyri helgina 10. febrúar n.k. Áhugasamir hafi samband við Eflingu stéttarfélag í síma 510-7500

                                                                         Veiðikortið 2012

Enn og aftur í sölu vegna mikilla vinsælda

Tekin hefur verið sú ákvörðun, vegna fjölda áskoranna, að bjóða aftur hið sívinsæla Veiðikort á sérkjörum fyrir félagsmenn.
Kortið verður til sölu frá og með 1. desember nk. á skrifstofu félagsins á aðeins kr. 3.000.- en fullt verð er kr. 6.000.-.
Kortið er tilvalin jólagjöf handa litlum og stórum veiðimönnum og konum.

Kortið er mjög hagkvæmur valkostur og veitir aðgang að 37 veiðivötnum um allt land. Með Veiðikortið í vasanum er ferðalagið fullkomið!

Um 7 ár eru síðan Veiðikortið kom fyrst fram á sjónarsviðið og má segja að frá fyrsta degi hafi það notið mikilla vinsælda.

Enda fjölgar sífellt í þeim hópi sem kýs að njóta heilbrigðrar útiveru með fjölskyldu við vötn og veiðar.

Með Veiðikortinu fylgir veglegur bæklingur með ýtarlegum upplýsingum, lýsingar eru á veiðisvæðum, kort og myndir.

Veiðikortið gildir fyrir einn fullorðinn og börn yngri en 14 ára í fylgd korthafa. Kortið er stílað á einn einstakling auðkennt með kennitölu hans.
Við kaup á Veiðikortinu missir félagsmaður 12 punkta.

Allar frekari upplýsingar og lista um veiðisvæði er hægt að nálgast á www.veidikortid.is

                                                                             Tímamót

Félagsmenn Eflingar í Brekkuskóg

Það voru skemmtileg tímamót á föstudaginn þegar við undirrituðum samning um kaup á tveimur glæsilegum húsum í Brekkuskógi, en húsin standa í fögru og kjarri vöxnu umhverfi  skammt frá þjóðveginum, segir Sveinn Ingvason sviðsstjóri orlofsmála hjá Efingu. Við erum stolt af því að geta nú boðið félagsmönnum nýtt og afar fallegt svæði með nýjum og vönduðum húsum,segir Sveinn. Brekkuskógur er gamalgróið orlofssvæði í nánd við Aratungu sem verður í uppbyggingu á næstu árum og ég efast ekki um að þessu nýmæli verður vel tekið af félagsmönnum.

Föstudaginn 28. október s.l. urðu tímamót á sviði orlofsmála hjá Eflingu stéttarfélagi þegar undirritaður var samningur um kaup á tveimur stórum og glæsilegum orlofshúsum í  Brekkuskógi.
Húsin eru glæsileg í alla staði,  94 fermetrar að stærð og verða afhent félaginu 15. janúar n.k.

Hluti af kaupverði húsanna er greitt með tveimur elstu húsum félagsins í Úthlíð og á Efri Reykjum en þau eru bæði komin nokkuð til ára sinna og kalla á talsvert viðhald.

Tímamótin felast fyrst og fremst í því að nú er Efling að hasla sér völl á nýju svæði í Brekkuskógi  en þar hefur félagið ekki átt hús áður.

Brekkuskógur er gamalgróið og vel þekkt orlofshúsasvæði og væntum við þess að þessum nýju kostum verði afar vel tekið af félagsmönnum.

                                                                                                                                Meðfylgjandi mynd er frá undirskrift samninga föstudaginn 28. október s.l um kaupin en á henni eru Kristjana Valgeirsdóttir fjármálastjóri Eflingar, Sveinn Ingvason forstöðumaður orlofssviðs, Sigurður Bessason formaður Eflingar, Leó Árnason f.h.  Óðins fasteignafélags sem byggir húsin og Þorsteinn Magnússon frá Fasteignasölunni Árborgum sem sá um viðskiptin.
 

                                                                      Sumarferð Eflingar 2011

Frábær ferð í alla staði

- segja Fanney og Þuríður

Dagana 14.-17. júlí var farin hin árlega sumarferð Eflingar stéttarfélags og að þessu sinni um Ísafjarðardjúp.Blíðskaparveður einkenndi þessa ferð frá fyrsta til síðasta dags. Ferðin var að þessu sinni með breyttu sniði frá fyrri ferðum þar sem ekið var að gististað og gist þar allar næturnar og síðan farnar dagsferðir undir dyggri leiðsögn „innfæddra“ leiðsögumanna sem gjörþekkja sitt svæði. Þær Fanney Friðriksdóttir og Þuríður Ingimundardóttir sem voru félagsmönnum til halds og trausts í ferðinni sögðu að ferðin hefði verið frábær í alla staði.

Haldið var af stað 14. júlí frá Sætúninu kl. 10.00 með rútu frá Teiti Jónassyni og var bílstjórinn okkar, Auðunn, einstaklega liðlegur og hjálplegur í alla staði.

Ekið var sem leið liggur í gegnum Borgarnes og Búðardal og var ný leið ekin um Arnkötludal (Þröskulda) til Hólmavíkur.

Ferðafólkið okkar fékk svo góðan tíma til að njóta sín þegar við stöldruðum við á Hólmavik áður en haldið var í Reykjanes.

Gist var alla dagana í Reykjanesi, þar leið öllum vel, gestrisni staðarhaldara, lipurð og liðlegheit var þar til fyrirmyndar. Fólk naut sýn hvort farið var í göngutúra eða synt og slappað af í lauginni þar.

Fornleifar í Vatnsfirði og Kaldalón
Á föstudeginum var svo haldið í ferð inn í Vatnsfjörð, komið þar við til þess að skoða uppgröft mikinn sem fornleifafræðingar eru búnir að vinna við undanfarin sumur. Síðan var tekinn hringur fyrir Vatnsfjarðarnes og kínverska brúin yfir Mjóafjörð skoðuð. Þá var ekið fyrir Ísafjörð og út Langadalsströnd og eins langt og hægt er að komast akandi á þessum slóðum, í Unaðsdal á Snæfjallaströnd. Vegurinn var ekki upp á það allra besta, með miklum þvottabrettum og í þrengra lagi og með svo þröngum brúm að litlu mátti muna að rútan kæmist yfir, en Auðunn stóð sig sérlega vel. Kaldalón var skoðað í leiðinni og veitingar þegnar í Dalbæ. Svo vel vildi til að lykill að Unaðsdalskirkju var staðsettur í Dalbæ einmitt þennan dag og bauðst okkur því að fá að fara í kirkjuna, þar voru sungnir sálmar í þessarri sérstöku kirkju sem staðsett er nánast í flæðarmálinu. Leiðsögumaður í þessari ferð var Ása Ketilsdóttir sem býr á Laugalandi í Skjaldfannardal og gjörþekkir svæðið og miðlaði okkur af miklum fróðleik.

Stórbrotið útsýni og mögnuð frásögn í kirkjugarði
Laugardagurinn 16. júlí byrjaði á því að við vorum sótt í Reykjanes í blíðskaparveðri á bát frá Ísafirði. Siglt var sem leið liggur meðfram Æðey að Unaðsdal og siglt út með Snæfjallaströndinni og skoðað af sjó það svæði sem við komumst ekki á akandi daginn áður. Stórbrotið útsýni og merkilegt að hundruð manna hafi búið þarna áður fyrr og fram undir miðja síðustu öld. Síðan var siglt inn í Jökulfirði að Hesteyri þar sem leiðsögumaður okkar hún Kiddý fræddi okkur um líf og menningu Hesteyrar fyrr og nú. Frásögnin, sem var mögnuð, fór fram í kirkjugarði staðarins þar sem áður var kirkja sem síðan var flutt til Súðavíkur. Góður gönguhringur var síðan tekinn og endað í Læknishúsinu þar sem veitingar voru bornar fram við dynjandi harmonikkuspil Hrólfs Vagnssonar. Veðrið var dásamlegt, sól og blíða sjórinn var svo sléttur að það eina sem sást á honum var kjölfarið eftir bátinn. Toppurinn þessa dags var síðan að frá Hesteyri þurfti að ferja fólk að bátnum í gúmmíbát, 8 manns í einu, og voru ferðalangar alsælir með það. Þá var siglt til Ísafjarðar þar sem gefinn var tími til að skoða sig um áður en haldið var á gististað. Við tókum á okkur smá krók til Bolungarvíkur til að fara gegnum nýju göngin. Komið var við í Súðavík við kirkjuna sem áður stóð í Hesteyri og virt fyrir sér hvernig hún hefði sómað sér þar. Síðan var komið við á Litlabæ í Skötufirði og skoðaðar magnaðar steinhleðslur sem eru sérstök fyrirbæri i byggingalist þeirra vestfirðinga.

Sunnudaginn 17. júli var ekin sama leiðin heim í rólegheitum og það var ánægður og glaður hópur sem kvaddist síðan við Eflingarhúsið. Þær Fanney og Þuríður voru í sjöunda himni með ferðina og sérstaklega það hvað ferðafélagarnir voru ánægðir með ferðina og til fyrir myndar í alla staði. Þá var mikil ánægja með nýbreytnina í ferðatilhögun að fá heimamenn til að leiðsaga fólk um sín heimalönd með allri þeirri þekkingu á heimahögum sem þetta fólk bjó yfir.

                                                                                   Efling í Veiðivötnum

Sannkölluð skemmtiferð

Ferð Eflingar í Veiðivötn laugardaginn 27. ágúst var sannkölluð skemmtiferð þar sem allt gekk eins og í sögu. Veðrið lék við ferðafélagana allan tímann, sól í heiði og mjög gott og milt veður í Veiðivötnum þegar þangað var komið upp úr hádegi. Vatnasvæði Veiðivatna er ævintýri út af fyrir sig, en ferðalöngum gafst kostur á góðri gönguferð um svæðið með leiðsögn fararstjóra. Ferðin var fullbókuð og svo er einnig um ferðina næstkomandi laugardag. Meðfylgjandi mynd var tekin af hópnum þegar haldið var úr Veiðivötnum. Alls voru um 150 manns í þessari fyrri ferð í þremur rútum.

Orlofshús

Spennandi dagsferðir Eflingar í Veiðivötn 27. ágúst og 3. september

Örfá sæti laus 

Hafið samband við skrifstofu í síma 510 7500.

Dagsferð Eflingar á Hítarvatn 2008

Byrjum að bóka 1. júlí

Dagsferðir Eflingar

Farið verður í Veiðivötn dagana 27. ágúst og 3. september
Ferðin kostar kr. 3.000,- pr. mann
Skráning á skrifstofu eða í síma 510 7500
Nánari upplýsingar um ferðina er í félagsblaðinu okkar

Lausir bústaðir í sumar

Vert er að vekja athygli á því að enn þá eru þónokkrir bústaðir óbókaðir yfir sumartímann.  Áhugasamir hafi samband við skrifstofu Eflingar í s. 510-7500. Listann yfir laus hús má sjá hér.  

      Mikið um framkvæmdir og margt á döfinni

- segir Sveinn Ingvason

Með efnahagshruninu fyrir rúmum tveimur árum hefur margt breyst í áherslum landsmanna þegar kemur að orlofsmálum. Mjög ákveðin þróun hefur orðið í þá átt að ferðast innanlands bæði sumar og vetur. Hér á orlofssviði hjá Eflingu höfum við ekki farið varhluta af þessari þróun og hefur orðið vart við mjög aukna eftirspurn eftir orlofshúsum félagsins, segir Sveinn Ingvason, sviðsstjóri orlofssviðs Eflingar.
 
Byggt og breytt!
Við þessari þróun hefur verið brugðist með ýmsum hætti, bætt hefur verið við húsum til útleigu og boðið upp á ýmsa aðra kosti samhliða. Nefna má að á árinu 2010 voru um 1000 Útilegu- og veiðikort niðurgreidd af orlofssjóði til félagsmanna.  Þannig er með ýmsu móti reynt að koma til móts við óskir sem flestra.

Augljóslega kallar svo aukin notkun á örari endurnýjun búnaðar og meira viðhald. Þannig hefur á þessum  sama tíma verið meira um framkvæmdir en oftast áður, bæði við að byggja ný hús í stað elstu húsa félagsins, svo og hefðbundið viðhald sem hefur verið með mesta móti s.l. ár.

Stærsta verkefnið nú er bygging tveggja nýrra húsa í Svignaskarði sem munu verða tekin í notkun næsta sumar en bygging þeirra stendur nú yfir af fullum krafti. Þetta eru stór og rúmgóð hús með þremur svefnherbergjum og glæsileg í alla staði. Við erum ákaflega stolt af þessari uppbyggingu, segir Sveinn.

Fleira á döfinni!
En það er fleira í gangi í orlofsmálum sem telja má til og er nú unnið við af fullum krafti. Hæst ber að nú er í skoðun að hefja uppbyggingu á landi Eflingar í Reykholti í Bláskógabyggð en félagið á þar skipulagt landsvæði fyrir nokkur orlofshús. Landsvæði þetta er afar fagurt og býður upp á mikla möguleika til afþreyingar og útivistar og er stutt til margra af fegurstu og vinsælustu stöðum á Suðurlandi. Nú í ársbyrjun mun liggja fyrir afstaða skipulagsyfirvalda á svæðinu til erindis okkar og í framhaldi verða teknar ákvarðanir um næstu skref í málinu.

Suðurland heillar
Lengi hefur verið til skoðunar að auka við framboð orlofshúsa á Suðurlandi en þar hefur einmitt verið einna mest eftirspurn á síðustu árum. Full bjartsýni ríkir um að áætlanir gangi eftir og að ekki  verði  langt að bíða þess að uppbygging hefjist í Reykholti. Ljóst  er að verkefnið er gríðarlega metnaðarfullt og að sama skapi mjög  kostnaðarsamt. Mun uppbygging þessi því augljóslega standa yfir um nokkurra ára skeið og vega þyngst í rekstri orlofssjóðs þann tíma sem hún stendur yfir.

            Veiðikortið

Tekin hefur verið sú ákvörðun, vegna fjölda áskoranna,  að bjóða aftur hið sívinsæla Veiðikort á sérkjörum fyrir félagsmenn. Kortið verður til sölu frá og með 1. desember nk. á skrifstofu félagsins á aðeins kr. 3.000.- en fullt verð er kr. 6.000.-.

Kortið er tilvalin jólagjöf handa litlum og stórum veiðimönnum og -konum.

Kortið er mjög hagkvæmur valkostur og veitir aðgang að rúmlega 30 veiðivötnum um allt land. Með Veiðikort í vasanum er ferðalagið fullkomið!

Um sex ár eru síðan Veiðikortið kom fyrst fram á sjónarsviðið og má segja að frá fyrsta degi hafi það notið mikilla vinsælda. Enda fjölgar sífellt í þeim hópi sem kýs að njóta heilbrigðrar útiveru með fjölskyldu við vötn og veiðar.
Með Veiðikortinu fylgir veglegur bæklingur með ýtarlegum upplýsingum, lýsingar eru á veiðisvæðum, kort og myndir.

Veiðikortið gildir fyrir einn fullorðinn og börn yngri en 14 ára í fylgd korthafa. Kortið er stílað á einn einstakling auðkennt með kennitölu hans.

Við kaup á Veiðikortinu missir félagsmaður 12 punkta.
Allar frekari upplýsingar
og lista um veiðisvæði
er hægt að nálgast
á www.veidikortid.is

Vestmannaeyjar – íbúð

Tekin hefur verið ákvörðun um að halda áfram að leigja íbúðina í Vestmannaeyjum. Þeir sem voru í íbúðinni í sumar lýstu yfir mikilli ánægju með hana og svo eru samgöngur til Eyja orðnar til fyrirmyndar. Íbúðin er á annarri  hæð í fjölbýli. Í íbúðinni eru tvö svefnherbergi, en gistirými fyrir 6 manns.

Endilega ef þið hafið hugsað ykkur að skoða Eyjarnar fögru hafið samband við skrifstofu í síma 510 7500 og pantið í tíma.“

Þegar þú ferð í orlofshús

Minnisblaðið þitt

Komutími - brottför

Leigutaka ber að vitja lykla á auglýstum tíma! Ef þið tefjist er alveg nauðsynlegt að láta umsjónarmann vita. Að öðrum kosti er ekki hægt að tryggja lyklaafhendingu!

Viðkomandi símanúmer koma fram á leigusamningi.

Húsbúnaður

Orlofshús Eflingar eru með svipuðum búnaði, ætluð fyrir 5 til 10 manns eftir stærð. Öll eldhúsáhöld eru til staðar, ísskápur, eldavél og örbylgjuofn.  Sængur og koddar, barnastóll og barnarúm, sturta, svo og sjónvarp, útvarp og kola- eða gasgrill.

Orlofshúsin eru sameign okkar, göngum um þau af alúð og sóma. Ef einhverju er ábótavant varðandi umgengni eða viðskilnað fyrri gesta vinsamlega látið þá umsjónarmann eða skrifstofu félagsins vita. Ef vanhöld eru varðandi þrif getur komið til þess að húsið verði þrifið á kostnað síðasta leigutaka.

Leigutaki þarf að hafa með sér handsápu, handklæði, diskaþurrkur, borðtuskur og salernispappír. Einnig lín utan um sængur og kodda. 

Öllum húsum Eflingar fylgja efni til þrifa, uppþvottalögur og burstar, gólfsápa og wc hreinsir. Gólfþveglar og moppur eru til staðar svo og kústar og ryksuga.

Bannað!

Gert er ráð fyrir að leigutakar nýti sjálfir ásamt fjölskyldum og/eða vinum hús sem þeir fá úthlutað. Framsal til annarra getur valdið því að viðkomandi félagsmaður verði útilokaður frá úthlutun framvegis. Það á einnig við ef leigutakar brjóta almennar reglur og skyldur sem þeir takast á hendur við leigu orlofshúsa.

Hafið samband

Hafi leigutaki einhverjar athugasemdir eða ef eitthvað vantar í húsin þá vinsamlegast látið umsjónarmenn á viðkomandi stað vita. Einnig er hægt að hafa samband við skrifstofu Eflingar-stéttarfélags  í síma 510-7500 (Ólöf eða Sveinn).

 

Reykskynjarar eru lífsnauðsynleg tæki í öllum húsum og hafa löngu sannað gildi sitt. Aldrei má taka rafhlöður úr þeim nema setja nýjar í eða láta umsjónaraðila eða skrifstofu félagsins vita. Munið að þessi smátæki hafa skipt sköpum og jafnvel bjargað mannslífum. Þess vegna verða þau að virka rétt.

Leigutaki ber ábyrgð á húsinu og öllu sem því fylgir. Skal hann þrífa vel eftir sig þ.m.t. ísskáp, eldavél og bakaraofn og örbylgjuofn, skápa, salerni og grill og skúra gólf. Einnig heita potta ef þeir eru. Stilla skal ofna á 1 - 2, loka gluggum og hurðum vandlega, skila lykli á sinn stað og taka rafmagnstæki úr sambandi. Komið ábendingum og athugasemdum til umsjónarmanna eða á skrifstofu Eflingar.