Sjúkrasjóður Eflingar - stéttarfélags

Sjúkrasjóðurinn er félagslegur samtryggingasjóður sjóðfélaga. Markmið sjóðsins er að styrkja sjóðfélaga er missa vinnutekjur eða ígildi þeirra vegna sjúkdóma eða slysa með því að greiða þeim dagpeninga í slysa- og sjúkdómstilfellum.  Ennfremur að vinna að fyrirbyggjandi aðgerðum er snerta öryggi og heilsufar sjóðfélaga.

Tilkynning til greiðsluþega Sjúkrasjóðs og Fræðslusjóða Eflingar-stéttarfélags

Frá og með 01.01.2010 mun greiðslutilkynning eingöngu koma til þín í heimabanka. Viljir þú frekar fá tilkynningu senda til þín í pósti en í heimabankann, þá vinsamlegast merktu í sérstakan reit á umsóknareyðublaði. Slóðin í heimabankanum þínum er þessi - Yfirlit - netyfirlit/rafræn skjöl - Efling, stéttarfélag. Þar undir getur þú skoðað greiðsluseðil þinn.

Athugið! Skila þarf gögnum fyrr í desember 2009 . Greitt verður út fyrir jólin.
Til að ná þeirri útborgun þarf að skila umsóknum og öðrum gögnum í síðasta lagi 15.12.09. Fyrsta útborgun 2010 verður um mánaðamótin janúar/febrúar 2010.

Stuðningur við atvinnulausa til heilsuræktar

Alþýðusamband Íslands, ASÍ, og Samtök heilsuræktarstöðva, SHS, gerðu 6. febrúar 2009 rammasamning um að styrkja einstaklinga í atvinnuleit til að stunda heilsurækt. Atvinnuleysi hér á landi hefur stóraukist undanfarið vegna erfiðs efnahagsástands. Að mati Alþýðusambands Íslands og Samtaka heilsuræktarstöðva eru það ótvíræðir hagsmunir einstaklinganna og þjóðfélagsins alls að atvinnuleitendum sé gefinn kostur á að rækta líkamlegt og andlegt atgervi. Færðar hafa verið sönnur á að regluleg hreyfing sé mikilvæg undirstaða heilbrigðis.

Vegna þessara aðstæðna hafa ASÍ fyrir hönd aðildarfélaga sinna og neðangreindar heilsuræktarstöðvar ákveðið að framlengja gildistíma samningsins til og með 31. desember 2010.

Þau stéttarfélög innan ASÍ sem gerast aðila að samningnum styrkja félagsmenn sína sem hafa misst vinnuna og eru atvinnulausir um kr. 2.000 að lágmarki á mánuði til að stunda heilsurækt. Heilsuræktarstöðvar innan SHS veita þessum viðskiptavinum að lágmarki 50% afslátt á greiðslu af mánaðarkortum stöðvanna.

Atvinnulausum félagsmönnum aðildarfélaga ASÍ sem gerst hafa aðilar að samningnum stendur nú til boða mánaðarkort á sérkjörum með stuðningi félagsins. Algengasta verð er frá 1.500 til 2.000 kr. á mánuði.

Eftirtaldar heilsuræktarstöðvar eru þátttakendur í verkefninu: Árbæjarþrek, Baðhúsið, Bjarg, Dansrækt J.S.B., Hress, Hreyfing, Sporthúsið, Toppsport, og World Class.

 LAUNASEÐLAR TIL SJÚKRASJÓÐS EFLINGAR

Þar sem allir styrkir og dagpeningar sjúkrasjóðs Eflingar eru tekjutengdir og miðast við innkomin iðgjöld síðustu 6 mánuði er nauðsynlegt að upplýsingar um skil á iðgjöldum til sjóðsins séu réttar til að úthlutun úr sjóðnum gangi fljótt og vel fyrir sig.

Vegna ástandsins í þjófélaginu fjölgar þeim fyrirtækjum því miður ört sem ekki geta staðið skil á iðgjöldum starfsmanna sinna á réttum tíma.
Því þarf að skila ljósriti af að minnsta kosti síðasta launaseðli með umsókn úr sjóðnum. 
Að öðrum kosti verður afgreiðslu umsóknar frestað. 

Ljósrit af launaseðlum  skal senda eða koma með á skrifstofu félagsins, senda á FAX-510-7501 eða rafrænt á efling@efling.is og merkja „Til sjúkrasjóðs“.