Undantekning að fólk fái rétt greitt fyrir vinnu sína

tryggvi

Undantekning að fólk fái rétt greitt fyrir vinnu sína

– segir Tryggvi Marteinsson

Jafnaðarkaup er ráðandi greiðslufyrirkomulag í veitingageiranum, seg-ir Tryggvi Marteinsson, þjónustufulltrúi hjá Eflingu. Þetta er algengasta greiðslufyrirkomulagið og síðan kemur fólk til okkar þegar það lætur af störfum og áttar sig á því að það hefur ekki fengið greitt eins og það átti að fá. Þrátt fyrir alla okkar viðleitni til að hafa áhrif á þetta, breytist lítið í þessu, segir hann.

Undantekningarlítið fái fólk þá greitt undir lágmarkslaunum og Efling innheimtir mismuninn.

Þetta eru einhver hundruð skipta á ári, segir Tryggvi. Fimmti hver félagsmaður okkar í Eflingu er í veitingageiranum en miklu meira en helmingur af vinnu okkar á hverju ári er vegna launakrafna hjá því fólki.

Í rauninni skipti ekki máli hvar fæti er stigið niður í veitingageiranum, þetta sé bara ráðandi þar. Aldur starfsfólksins skipti ekki máli heldur. Tryggvi bendir á að fólk í vaktavinnu eigi rétt á vetrarfríi en á 20 ára ferli sínum hjá Eflingu hafi hann aldrei séð að þeim rétti sé fylgt eftir í framkvæmd.

Það eru örfáir staðir sem eru í lagi en þeir eru algjör undantekning, segir hann.