Iðnaðarráðherra fjallaði um framkvæmdir á árinu

Iðnaðarráðherra, Össur Skarphéðinsson, fjallaði á fjölmennum félagsfundi Eflingar-stéttarfélags á þriðjudagskvöldið um þær framkvæmdir sem fyrirhugaðar eru á vegum stjórnvalda á þessu ári og næstu misserum. Fram kom í máli hans að Íslendingar standa frammi fyrir miklum möguleikum í ýmiss konar sprotafyrirtækjum, nýjum verksmiðjurekstri ásamt öðrum hefðbundnari atvinnurekstri í álverum og miklum framkvæmdum í vegagerð á árinu. Miklar umræður spunnust á fundinum um atvinnumálin og það atvinnuleysi sem nú dynur á þjóðinni. Össur sagðist sammála þeirri stefnumörkun Eflingar og verkalýðshreyfingarinnar á þessum tíma að leggja aðaláhersluna á atvinnu fólks í yfirstandandi kreppu. Hann var bjartsýnn á að það tækist að vinna þjóðina í gegnum kreppuna og nefndi fjölmarga möguleika í því sambandi m.a.rannsóknarvinnu vegna olíuleitar á Drekasvæðinu norðaustur af landinu.