Trúnaðarráðsfundur 6. okt 09

7. 10, 2009


Efling-stéttarfélag

Nýtum öll tækifæri til atvinnuuppbyggingar

Fjölmennur fundur trúnaðarráðs Eflingar-stéttarfélags hvatti í gærkvöldi stjórnmálamenn til að sameinast um atvinnuuppbyggingu svo komast megi hjá frekara tjóni á atvinnulífi landsmanna en orðið er. Fundurinn varar við öllum áformum sem sent geti stóra hópa launafólks beint á atvinnuleysisskrá. Þá varar félagið harðlega við aukinni skattlagningu á almennar launatekjur þegar skuldabyrði heimilanna fer vaxandi og atvinnutekjur margra heimila dragast saman. Félagið leggur mikla áherslu á að öll tækifæri til að skapa atvinnu verði nýtt á næstunni til að vinna þjóðina út úr kreppunni.

Efling-stéttarfélag hvetur stjórnmálamenn í landinu til þess að taka höndum saman um að rjúfa þann vítahring sem kominn er upp í stjórnun landsins.

Mikilvægast af öllu er að hefja nýja sókn í atvinnumálum með tímasetningu arðbærra framkvæmda og verkefna um allt land og hraða vinnu með verkalýðshreyfingu, atvinnurekendum og lífeyrissjóðum til að fá hjól atvinnulífsins í gang á ný.

Félagið varar við öllum áformum sem leitt geta til meiri atvinnuleysis. Það er engin lausn að segja upp stórum hópum launafólks sem fara beint á atvinnuleysisskrá eða verða að leita til sveitarfélaganna með framfæri fjölskyldna sinna. 

Efling-stéttarfélag varar einnig við aukinni skattlagningu á almennar launatekjur um leið og skuldabyrði heimilanna fer vaxandi og atvinnutekjur dragast saman.

Þjóðin verður við þessar aðstæður að sækja í auknum mæli í auðlindir sínar til að komast út úr keppunni.  Öll tækifæri til að skapa aukna atvinnu ber að nýta, hvort sem um nýjar virkjanir, stóriðju, ferðaþjónustu,  aukna sókn á fiskimiðin eða uppbyggingu í landbúnaði.

Full atvinna landsmanna er undirstaða alls annars sem gera þarf við uppbyggingu landsins eftir hrunið.

Efling-stéttarfélag hvetur stjórnmálamenn  til að sameinast um atvinnuuppbyggingu þegar í stað svo að komast megi hjá frekari tjóni á atvinnulífi landsmanna en orðið er.