Nafnasamkeppni – 50.000 kr. í vinning

Efling ýtir úr vör skóla fyrir félaga sína á vormisseri. Um er að ræða uppstokkun á núverandi fræðslufyrirkomulagi stéttarfélagsins auk nýrrar námsbrautar. Markmiðið er að færa fræðslu til félaga í nútímalegra horf, gera hana fjölbreyttari, markvissari og áhugaverðari en áður.Með skólanum er mynduð eins konar regnhlíf yfir núverandi kennsluframboð Eflingar, þ.e. trúnaðarmannafræðslu, fræðslumorgnana Drop-Inn, virkninámskeið, starfslokanámskeið og önnur stök námskeið. Jafnframt verður boðið upp á svokallað almenna braut fyrir alla Eflingarfélaga.Á almennu brautinni er Eflingarfélögum veittur stuðningur, tæki og tól til að hafa aukin áhrif, beita sér í þágu verkalýðsbaráttunnar og samfélagsmála almennt. Brautin skiptist upp í fjóra hluta.Í fyrsta hlutanum, sem verður kenndur í apríl, verður Eflingarfélögum bent á tækifæri til áhrifa, veitt leiðsögn í tjáningu, leiðbeint um notkun samfélagsmiða og ýmsar aðrar árangursríkar leiðir til að koma skoðunum sínum og hugsjónum á framfæri.Almenn braut Eflingar

Hvað á skólinn að heita?

– Nafnasamkeppni – 50.000 kr. í vinning.

Efnt er til samkeppni um heiti á hinum nýja skóla. Til þess að taka þátt í nafnasamkeppninni sendir þú tillögu, ásamt fullu nafni og kennitölu, á efling@efling.is eða í síma 510-7500 fyrir 1. mars nk. Eigandi vinningstillögunnar hlýtur 50.000 kr. í verðlaun. Hægt er að hafa samband við Fríðu Rós, teymisstjóra fræðslumála hjá Eflingu ef óskað er frekari upplýsinga, frida@efling.is/510-7578.Dómnefnd áskilur sér rétt til að hafna öllum innsendum tillögum þyki engin þeirra hæfa og verður skólanum þá fengið nafn eftir öðrum leiðum.