Nýtt námskeið hjá Eflingu

Nú lærum við á tryggingarnar!

Námskeið sem borgar sig

Stutt, hnitmiðað námskeið þar sem farið er yfir ýmislegt sem tengist tryggingarmálum.  Námskeiðið er tvisvar sinnum tveir tímar.  Fyrra kvöldið er 31. janúar kl. 19.30-21.30 og seinna kvöldið er þann 28. febrúar á sama tíma.  Námskeiðið er haldið í húsnæði Eflingar stéttarfélags, Sætúni 1, 4. hæð.
Fyrra kvöldið er farið yfir ýmislegt sem tengist tryggingamálum og þátttakendur fá leiðbeiningar um hvernig þeir geta aflað sér tilboða í tryggingar sínar hjá hinum ýmsu tryggingafélögum ásamt því að gera tilboðsbeiðni til að senda á Tryggingafélögin.  Seinna kvöldið verður síðan farið yfir tilboðin sem hafa borist og verð og innihald borið saman þannig að hægt sé að nýta sér hagstæðasta tilboðið.

                                                                            Sambýlið Breiðabólsstaður

Lífið er fullt af tilviljunum

- segja hjónin Pétur Ottósson og Ólöf Haraldsdóttir

Pétur og Ólöf hafa búið á bænum Breiðabólsstað í 20 ár og hefur starfsemin þar tekið ýmsum breytingum í gegnum árin. Þau byrjuðu á að taka til sín börn í sumarvist en reka nú sambýli fyrir geðfatlaða menn ásamt því að hafa ávallt stundað einhvern búrekstur samhliða.

Hækkun á kauptryggingu og kaupliðum hjá sjómönnum

Samkomulag hefur náðst á milli LÍÚ og samtaka sjómanna um að hækka kauptryggingu og aðra kaupliði hjá sjómönnum um sömu prósentuhækkun og samið var um á almenna vinnumarkaðnum.

                                                  Vernd og réttarstaða uppljóstrara

Eftir Magnús M. Norðdahl hrl., lögfræðing ASÍ.

Uppljóstrarar njóta sérstakrar verndar í ráðningarsambandi skv. ákvæðum 10. gr. Mannréttindasáttmála Evrópu (MSE) sem fjallar um verndun tjáningarfrelsis. Það var staðfest með dómi Mannréttindadómstóls Evrópu þann 21.7. 2011 þar sem fyrirvaralaus uppsögn hjúkrunarfræðings, sem kært hafði hjúkrunarheimili þar sem hún starfaði fyrir vanrækslu, var dæmd ólögmæt og skaðabótaskyld.

Opinn fundur ASÍ

Hvað getum við lært af Dönum?

Þriðjudaginn 24. janúar stendur Alþýðusamband Íslands fyrir morgunverðarfundi um húsnæðismál.  Fundurinn fer fram á Hilton Reykjavík Nordica og stendur frá kl. 8-10. Yfirskrift fundarins er: Hvað getum við lært af Dönum? Hvernig má lækka húsnæðisvexti heimilanna? Aðalræðumaður fundarins er Peter Jayaswal aðstoðarframkvæmdastjóri samtaka húsnæðislánveitenda í Danmörku.

                                                                                                                                        Samninganefnd Flóafélaganna samþykkir umboð til framlengingar samninga

Kjarasamningar framlengdir

Karasamningur á milli Eflingar og Samtaka atvinnulífsins mun vera áfram í gildi en samninganefnd ASÍ ákvað í dag að segja ekki upp gildandi kjarasamningi. Launabreytingar munu því taka gildi þann 1. febrúar n.k.  og  launataxtar hækka um 11.000 kr. og almenn laun hækka um 3,5 %.

Yfirlýsingu samninganefndar ASÍ má sjá hér.

Launatöflu Eflingar og Samtaka atvinnulífsins frá 1. febrúar 2012 má sjá hér.

Fundur  samninganefndar Flóafélaganna

Samþykkir umboð til framlengingar samninga

Mikil óánægja með stjórnvöld á fundinum

Samninganefnd Flóafélaganna, Eflingar, Hlífar og VSFK samþykkti í gærkvöldi 18. janúar ´12 með einróma ályktun þar sem umboð er veitt til framlengingar kjarasamninganna. Í ályktuninni eru stjórnvöld harðlega gagnrýnd fyrir að hafa ekki staðið við sinn hluta af fyrirheitum sem veitt voru við gerð kjarasamninganna. Á fundinum kom fram mikil gagnrýni á núverandi stjórnvöld vegna vanefnda ríkisstjórnarinnar  en fundurinn taldi engar forsendur til að slíta kjarasamningi við atvinnurekendur þar sem þeir hafa staðið við ákvæði samninganna.
Ályktunin er meðfylgjandi ásamt samþykkt um umboð til framlengingar samninganna.

                                                                                 Átak á vegum ASÍ, SA og RSK skilar árangri

Harðari viðurlög við alvarlegri brotum

- segir Tryggvi Marteinsson

Ég tel að þetta starf hafi skilað miklum árangri, segir Tryggvi Marteinsson, starfsmaður Eflingar sem hefur tekið þátt í átaki Ríkisskattstjóra, ASÍ og SA á undanförnum vikum. Nú síðast var farið á veitingastaði í miðbæ Reykjavíkur í eftirlitsferð og það er alveg ljóst að hér er á ferðinni þarft framtak til að hér geti þróast heilbrigðara atvinnulíf. Það sem nú þarf að gerast er að hægt sé að beita viðurlögum strax á vinnustöðum þar sem alvarleg brot eru í gangi svo sem þegar fyrirtæki skila ekki vörslusköttum, segir hann. Ríkisskattstjóri á að geta lokað fyrirtækjum í slíkum tilvikum.  Til þess þarf að breyta lögum, segir Tryggvi og Ríkisskattstjóri hefur fullan stuðning okkar megin í verkalýðshreyfingunni fyrir þeirri breytingu.

                                                                               Viðræður um forsendur kjarasamninga

- Niðurstöðu að vænta 20. janúar

Fyrirspurnir eru þegar farnar að berast Eflingu um framhald núgildandi kjarasamninga. Þessa dagana standa einmitt yfir viðræður meðal aðildarfélaga ASÍ um  framhald kjarasamninga við Samtök atvinnulífsins.  Gert er ráð fyrir því að sameiginleg forsendunefnd ASÍ og SA skili niðurstöðu ekki síðar en 20. janúar nk.   Samninganefnd Flóabandalagsins þ.e. Efling, Hlíf í Hafnarfirði og VSKF í Keflavík fundar 18. janúar næst komandi.  Það verður því ekki fyrr en í lok þeirra viðræðna sem að  niðurstöðu verður að vænta hvernig fer með þær launabreytingar sem taka eiga gildi á almennum markaði 1. febrúar 2012. 
 

                                                                                          Hvað viltu læra? – Í boði Eflingar

Margir stíga fyrstu skrefin hjá okkur

- segir Sigurrós Krisinsdóttir

Það eru mörg spennandi tækifæri til náms hjá Eflingu, bæði hjá félaginu sjálfu og námi sem við skipuleggjum með samstarfsaðilum. Starf okkar í menntamálum er eitt af því sem sem einkennir starfsemi Eflingar og þúsundir félagsmanna verða varir við, segir Sigurrós Kristinsdóttir, varaformaður Eflingar. Við erum mjög stolt af því að Efling varðar oft fyrstu skrefin inn í að efla fólk í starfi með námskeiðum og fræðslustarfi en margir halda síðan áfram í frekara námi. Við erum stöðugt að endurnýja okkur og nú er komið að námi fyrir heyrnarlausa einstaklinga en það verkefni hefur fengið nafnið Döff-menntaskólinn. Spurningin hjá Eflingu er ekki hvort þú vilt styrkja þig, heldur hvað þú vilt læra, segir Sigurrós.

                                                                                   Ólafur Darri Andrason

Óstöðugur gjaldmiðill kallar á háa vexti

Óstöðugur gjaldmiðill er ein megin orsök þess að vextir eru miklu hærri á Íslandi en í nágrannalöndunum. Þessir háu vextir hafa margvísleg áhrif á okkur.

                                                                                Leiðari 1.tbl. 2012                                     

Siðlaus skattlagning lífeyriseignar

segir Sigurður Bessason

Umræða undanfarinna vikna um skattlagningu lífeyriseignar sjóðfélaga í sameignar- og séreignarsjóðum landsmanna hefur dregið fram skil í afstöðu annars vegar stjórnmálamanna og hins vegar forystumanna atvinnulífsins sem staðið hafa að uppbyggingu lífeyriseignar sjóðfélaga á almennum markaði.

                                       Getum ekki sætt okkur við atvinnuleysið

- segir Sigurður Bessason, formaður Eflingar

Við getum ekki og eigum ekki að sætta okkur við þetta atvinnuleysi. Það tekur ekki bara frá okkur möguleikann til að lifa mannsæmandi lífi.  Það eyðileggur sjálfsmynd okkar og trú á framtíðina. Nú erum við að sjá fjórða ár í kreppu og á þriðja þúsund félagsmanna í Eflingu eru atvinnulausir og þar af eru langtímaatvinnulausir stækkandi hópur. Við sjáum ýmis merki þess að fjárhagur margra fjölskyldna sé í úlfakreppu, því mjög hafi þrengt að á síðustu misserum. Í nýrri viðhorfskönnun fjölgar þeim sem draga við sig í útgjöldum s.s. í ferðalögum, fatnaði og tómstundum. Alvarlegast er að fjöldi fólks dregur við sig í matarinnkaupum, lyfjakostnaði og heilbrigðisþjónustu. Þetta segir Sigurður Bessason, formaður Eflingar í samtali við Fréttablað félagsins. Ég hef miklar áhyggjur af því að samfélag okkar sé að breytast og fólk fari að sætta sig við atvinnuleysið sem hluta af lífinu. Það má ekki gerast og nú verða stjórnvöld og fyrirtækin að snúa af þessari braut, segir hann.

Mikilvægt að greiða áfram séreignarsparnað

-Frádráttarbært iðgjald launamanns lækkar úr 4% í 2%

Nú um áramótin ganga í gegn breytingar á lögum er varða skattlagningu lífeyrissparnaðar. Frádráttarbært viðbótariðgjald launamanns sem ráðstafað er í séreignarsparnað lækkar við þessa breytingu úr 4% í 2% af launum. Haldi launamaður áfram að greiða 4% framlag í viðbótarlífeyrissparnað mun það leiða til tvísköttunar á þessum hluta iðgjaldsins. Mótframlag atvinnurekenda verður áfram 2%. Þá er mikilvægt að benda á að ekki er greiddur fjármagnstekjuskattur af þessum sparnaði eins og af hefðbundnum innlánsreikningum.  Launafólki er því eindregið ráðlagt að halda áfram með þann hluta séreignarsparnaðar sem ekki er tvískattaðar þar sem hin frádráttarbæru iðgjöld verða með hagkvæmustu sparnaðarleiðum sem gefast þrátt fyrir þessa breytingu.

Jólaball Eflingar stéttarfélags verður haldið fimmtudaginn 29. desember í Valsheimilinu Hlíðarenda kl. 16:30.
Húsið opnar kl.16:00.

Stjórnvöldin

Skerða lífeyrinn

Verkalýðshreyfingin mótmælir skattlagningu

Nýtt frumvarp ríkisvaldsins gerir ráð fyrir nýrri skattheimtu á lífeyrissjóði sem þýðir jafnframt að skerða þarf réttindi sjóðfélaga í sjóðnum.  Fjármálaráðherra lítur svo á að  samkomulag sé um það við verkalýðshreyfinguna að lífeyrissjóðirnir fjármagni að hluta  vaxtabætur til að mæta kostnaði lántakenda húsnæðislána eftir efnahagshrunið. Þessu hefur verkalýðshreyfingin mótmælt harðlega og bendir Efling m.a. á að tæplega helmingur félagsmanna Eflingar búi í eigin húsnæði og engar forsendur séu til að skattleggja lífeyrisréttindi þessa hóps sérstaklega.

                                                                                     Vilt þú lækka tryggingar heimilisins?

Hvetjum fólk til að leita tilboða

- segir Smári Ríkharðsson

Hver þekkir ekki umræðuna á vinnustaðnum þar sem vinnufélaginn hefur hringt í tryggingafélagið sitt og státar af því að hafa lækkað heimilis- og bílatryggingarnar um tugi þúsunda. Það fer minna fyrir umræðunni um að á hverju ári hækka tryggingafélögin iðgjöld sín og taka þannig oft hljóðlega burtu ávinninginn sem viðskiptamaðurinn hafði af lækkun síðasta iðgjaldaárs. Félögin gæta þess að hafa iðgjöldin hæfilega ógagnsæ og hækka grunntaxta sína og lækka afslætti oft án þess að viðskiptamenn verði þess varir. Þetta segir Smári Ríkharðsson, sérfræðingur í tryggingum, en hann mun á næstunni aðstoða félagsmenn Eflingar-stéttarfélags við að ná hagkvæmari iðgjöldum með fræðslu og ráðgjöf á vegum félagsins.

                                                                                  Leiðari 6. tbl. Eflingar, desember

Ekkert annað í boði

segir Sigurður Bessason

Þegar forystumenn launafólks og atvinnurekenda taka til skoðunar framhald kjarasamninga í næsta mánuði verður þeim mikill vandi á höndum. Forsendur kjarasamninganna og flestar aðstæður á vinnumarkaði eru mjög andstæðar launafólki. Vonir sem bundnar voru við kjarasamningana í sumarbyrjun 2011 eru því miður ekki að skila launafólki þeim markmiðum sem stefnt var að - að minnsta kosti ekki fram að þessu.

                                                                                            Dagsbrúnarfyrirlestur 2011

Saga verkalýðshreyfingar á Vestfjörðum 1890-1930

Þann 8. desember mun sagnfræðingurinn Sigurður Pétursson halda fyrirlestur sem ber heitið Saga verkalýðshreyfingar á Vestfjörðum 1890-1930. Fyrirlesturinn verður haldinn kl. 12:05 í ReykjavíkurAkademíunni, Hringbraut 121, 4. hæð

                                                                         Veiðikortið 2012

Enn og aftur í sölu vegna mikilla vinsælda

Tekin hefur verið sú ákvörðun, vegna fjölda áskoranna, að bjóða aftur hið sívinsæla Veiðikort á sérkjörum fyrir félagsmenn.
Kortið verður til sölu frá og með 1. desember nk. á skrifstofu félagsins á aðeins kr. 3.000.- en fullt verð er kr. 6.000.-.
Kortið er tilvalin jólagjöf handa litlum og stórum veiðimönnum og konum.