Mat á erlendu námi
Hvert fer ég með erlend námsgögn?
Ef þú hefur lokið námi erlendis getur verið gagnlegt að fá það metið á Íslandi. Mat getur nýst ef þú vilt sækja um nám, sýna fram á menntun þína í starfsumsókn eða kanna hvort námið veiti réttindi til að starfa hér á landi.
Rétt leið fer eftir því hvaða nám þú hefur lokið og hvað þú vilt nota matið í.
ENIC/NARIC er opinber þjónusta sem tekur við umsóknum um mat á erlendu námi.
Ég hef lokið framhaldsskólanámi erlendis
Ef þú hefur lokið námi frá framhaldsskóla erlendis getur þú sótt um mat hjá ENIC/NARIC.
Matið getur nýst ef þú vilt sýna hvaða menntun þú hefur lokið eða undirbúa frekara nám á Íslandi.
Ég hef lokið háskólanámi erlendis
Ef þú hefur lokið háskólanámi erlendis getur þú sótt um mat hjá ENIC/NARIC.
Matið sýnir hvernig námið tengist íslensku menntakerfi. Það getur nýst þegar þú sækir um nám, starf eða þarft að sýna fram á menntun þína.
Ég lærði til starfs sem krefst starfsréttinda
Sum störf á Íslandi krefjast sérstaks leyfis. Þá máttu ekki starfa við greinina fyrr en menntun þín eða réttindi hafa verið viðurkennd.
Þetta getur til dæmis átt við um iðngreinar, heilbrigðisgreinar og önnur störf þar sem sérstök réttindi eru áskilin.
Þetta er ekki það sama og almennt mat á námi. Almennt mat sýnir hvaða námi þú hefur lokið. Mat til starfsréttinda snýst um hvort þú megir starfa í ákveðnu starfi á Íslandi.
Ég er með nám frá Danmörku, Finnlandi, Noregi, Póllandi eða Svíþjóð
Fyrir sum próf frá þessum löndum getur verið hægt að fá staðfestingu strax hjá ENIC/NARIC, án þess að senda inn hefðbundna umsókn.
Slík staðfesting getur nýst með námsgögnum þegar þú sækir um nám eða starf. Ef námið tengist starfi sem krefst starfsleyfis þarf samt að skoða það sérstaklega.
Ég hef starfsreynslu en ekki formlegt nám
Ef þú hefur lært mikið í starfi en ekki lokið formlegu námi gæti raunfærnimat átt betur við en mat á erlendu námi.
Í raunfærnimati er skoðað hvað þú kannt og hefur gert í starfi. Það getur hjálpað þér að fá reynslu metna, stytta nám eða sjá hvaða skref vantar upp á.
Kostar að fá nám metið?
Almennt akademískt mat hjá ENIC/NARIC er gjaldfrjálst. Það á við um mat á erlendu framhaldsskólanámi og háskólanámi.
Annar kostnaður getur þó komið til, til dæmis vegna þýðinga á gögnum eða ef sótt er um sérstakt starfsleyfi hjá öðrum aðila.
Gott að hafa tilbúið
Það getur flýtt fyrir að safna gögnum áður en þú sækir um mat.
Dæmi um gögn sem geta nýst:
- prófskírteini
- yfirlit yfir áfanga eða einkunnir
- lýsing á námi, ef hún er til
- þýðingar á gögnum, ef þess er óskað
- ferilskrá eða upplýsingar um starfsreynslu, ef hún skiptir máli
Þú þarft ekki að vera með allt tilbúið áður en þú biður um aðstoð.
Ekki viss hvert þú átt að leita?
Byrjaðu á náms- og starfsráðgjöf.
Ráðgjafi getur hjálpað þér að átta þig á því hvort þú eigir að leita til ENIC/NARIC, skóla, stjórnvalds, fræðsluaðila eða annars aðila.
