Fréttir

Sendlar Wolt komu saman í félagsheimili Eflingar í dag

Ríkið herðir kröfur til ræstingaútboða

Efling stendur fyrir bíósýningu fyrir félagsmenn sína og fjölskyldur þeirra í vetrarfríi grunnskóla, föstudaginn 23. október. Sýnd verður fjölskyldumyndin Hrúturinn Hreinn: Forynjan á Flóamýri í Laugarásbíó kl. 14:00. Íbúar Mosabotna-býlisins hlakka til hrekkjavökunnar – þangað til klaufski bóndinn eyðileggur ástkæra graskersbeð hjarðarinnar! Þegar Hrúturinn Hreinn bregður sér í hlutverk galins vísindamanns til að laga vandann fer allt úr böndunum. Bóndinn er týndur og villidýr gengur laust í skógum Mosabæjar. Miðasala er hafin og fer fram á Mínum síðum Eflingar. Miðinn kostar 500kr. og innifalið er popp og gos eða djús. Hámark 5 miðar fyrir hvern félagsmann.

Stjórnvöld hafa lagt fram frumvarp um hömlur á hækkanir leigu, bæði fyrir íbúðarhúsnæði og atvinnuhúsnæði. Frumvarpið markar tímamót í reglun leigumarkaðarins á Íslandi sem hefur verið í algjörum ólestri, með óhóflegum hækkunum og miklu óöryggi leigjenda. Efling hefur lengi barist fyrir innleiðingu á leigubremsu og lagði stjórn Eflingar útfærðar tillögur fyrir stjórnvöld síðastliðið vor. Hið nýja frumvarp kemur að verulegu leyti til móts við þær tillögur Eflingar. Helstu nýmælin eru eftirfarandi: Mánaðarlegar hækkanir eru bannaðar. Minnst 12 mánuðir þurfa að líða milli hækkana, sem þurfa að vera samningsbundnar. Árlegar hækkanir mega ekki verða meiri en hækkun verðlagsvísitölunnar, en leiga íbúðarhúsnæðis hefur hækkað mjög langt umfram almennt verðlag hér á landi á síðustu 10-15 árum. Þannig eru settar hömlur á einn af stærstu drifkröftum verðbólgunnar. Sett eru viðmið um svigrúm til hækkana á leigu við upphaf og endurnýjun leigusamninga og tekið fyrir margþættar verðhækkanir á sama tíma. Birtar verða reglulega viðmiðunartölur um markaðsverð á leigu eftir gerðum húsnæðis og staðsetningu sem verða leiðbeinandi við samninga um leiguverð. Öryggi og neytendavernd leigjenda verða efld. Efling hefði viljað ganga enn lengra, t.d. með því að miða þak á árlegar hækkanir leigu við verðlagsvísitölu án húsnæðisliðarins, sem hefði hægt meira á verðbólgunni, en frumvarpið miðar við almenna vísitölu neysluverðs. Þakið verður samt afar mikilvægt því leiga hefur hækkað langt umfram almennt verðlag á síðustu 10-15 árum. Með frumvarpinu er í senn bættur hagur leigjenda svo um munar og um leið eru settar hömlur á mikilvægan þátt sem hefur magnað upp verðbólguna hér á landi á síðustu árum. Mikilvægt er að frumvarpið fái skjóta afgreiðslu og komi til framkvæmda sem fyrst.

Hátíðin Matur og menning fór fram í félagsheimili Eflingar sunnudaginn 27. september í fjórða sinn, þar sem félagsfólk Eflingar bauð gestum að kynnast matarmenningu frá sínum upprunalöndum. Á boðstólum var fjölbreytt úrval rétta sem félagsfólk hafði útbúið og gestir fengu tækifæri til að ferðast um heiminn með bragðlaukunum. Þar má meðal annars nefna heilsteikt svín að filippseyskum hætti, vorrúllur frá Víetnam, sjávarréttasúpu frá Hondúras, auk fjölmargra annarra rétta. Hátíðin var vel sótt og skapaðist lífleg og ánægjuleg stemning þegar Eflingarfélagar og fjölskyldur þeirra og gestir komu saman til smakka mat frá ólíkum löndum og kynnast menningu félagsfólks Eflingar.. Það var Eflingu mikill heiður að taka á móti frábærum gestum, forseta Íslands, frú Höllu Tómasdóttur, og eiginmanni hennar, Birni Skúlasyni. Matur og menning er hátíð sem fagnar þeim mikla fjölbreytileika sem einkennir félagsmannahóp Eflingar og það var dýrmætt tækifæri fyrir Eflingu að fá að kynna menningu, hefðir og matagerð félagsfólks fyrir forsetahjónunum.