Mikilvægur sigur í einu Wok On málanna fyrir Landsrétti

Dagsetning

24. júní 2026

deila

Afar þýðingarmikill sigur vannst fyrir Landsrétti í gær þegar dómurinn úrskurðaði í máli manns sem unnið hafði hjá veitingastaðnum Vietnam restaurant áður en staðurinn var tekinn til gjaldþrotaskipta. Viðurkenndi dómurinn meðal annars að launakröfur mannsins skyldu ná til yfirvinnu hans og sneri þar með við úrskurði Héraðsdóms Reykjavíkur. Er um gríðarlega mikið hagsmunamál að ræða, bæði fyrir umræddan mann og fyrir um á fjórða tug annarra starfsmanna, þar á meðal Eflingarfélaga, sem bíða úrlausnar sinna mála.
 
Vietnam Restaurant var í eigu veitingamannsins Quang Lé en félög í hans eigu voru tekin til gjaldþrotaskipta eitt af öðru árið 2024. Hafa málin í heild sinni gjarnan verið kennd við Wok On, umfangsmestu veitingakeðju Lé. 


Grunur um mansal og önnur brot


WOKON, rekstrarfélag Wok On, var tekið til gjaldþrotaskipta 12. júní 2024, en fyrir þann tíma hafði lögregla ráðist í umfangsmiklar aðgerðir sem beindust að fyrirtækjum Quang Lé. Var hann grunaður um mansal, peningaþvætti, brot á atvinnuréttindum útlendinga og skipulagða brotastarfsemi. Átti Quang Lé alls átta félög á þessum tíma sem ýmist héldu utan um rekstur veitingastaða eða voru fasteignafélög. 
 

Vietnam restaurant var úrskurðað gjaldþrota 12. september 2024 og á málið sem Landsréttur úrskurðaði í gær rætur að rekja til þess. 


Svikin um laun fyrir yfirvinnu


Fyrir dómi var þess krafist að þrotabúið greiddi manninum vangoldin laun hans, annars vegar vegna dagvinnu og hins vegar vegna yfirvinnu, auk orlofs. Skiptastjóri þrotabúsins hafði þegar fallist á að greiða dagvinnulaunin en ágreiningur var um yfirvinnu, þar sem krafan var tæpar 15 milljónir króna. Byggði sú krafa á því að maðurinn hafði frá upphafi ráðningarsamnings síns, sem gerður var í febrúar 2022, unnið mun meira en hann fékk greitt fyrir. Hann hafi að jafnaði unnið tólf klukkustundir á dag, sex daga vikunnar. 


Við málareksturinn var á það bent að það er á ábyrgð vinnuveitanda að halda utan um unnar yfirvinnustundir, samkvæmt lögum. Það hafi hann hins vegar ekki gert. Skiptastjóri þrotabúsins hélt því hins vegar fram að starfsmaðurinn fyrrverandi yrði að færa sönnur á að hann hefði unnið umrædda yfirvinnu. 


Vitnisburður samstarfsfólks gerði gæfumuninn


Í ljósi þess að ekki voru tiltæk skjöl eða tímaskráningar um vinnutíma leiddi starfsmaðurinn fyrrverandi fram fjölda vitna, fyrrverandi starfsmenn Vietnam Restaurant, sem báru um það vitni að vinnutími mannsins, sem og þeirra allra, hefði verið tólf klukkustundir á dag, sex daga vikunnar. Sömu vitnisburðir lágu fyrir í skýrslum lögreglu af starfsfólkinu, auk þess sem upplýsingar um opnunartíma veitingastaðarins gáfu þeim vitnisburðum vægi. 


Í úrskurði Landsréttar kemur fram að í ljósi þess að ekki hafi neitt komið fram um að Vietnam Restaurant hafi komið upp kerfi til að halda utan um unnar vinnustundir, svo sem skylt er, sé það á ábyrgð vinnuveitandans, og þar með skiptastjóra þrotabúsins, að hnekkja staðhæfingum starfsfólksins um vinnutíma. Það hafi þrotabúið ekki gert.


Tæpar 20 milljónir úrskurðaðar sem forgangskröfur


Dómurinn féllst því á kröfu starfsmannsins fyrrverandi um að hann hefði unnið mikla yfirvinnu sem skyldi hafa stöðu forgangskröfu í þrotabúið. Alls var upphæð yfirvinnunnar sem dómurinn úrskurðaði um rétt rúmar 14 milljónir króna. Þá var jafnframt fallist á aðrar kröfur, þ.e. um dagvinnu og orlof.
 
Alls úrskurðaði Landsréttur því að kröfur starfsmannsins fyrrverandi, að fjárhæð tæpar 19,9 milljónir króna, skyldu njóta forgangs sem launakröfur við skipti á þrotabúi Vietnam Restaurant. 


Kærufrestur til Hæstaréttar vegna málsins er tvær vikur en alls óljóst er hvort málinu verði áfrýjað. 


Launaþjófnaður á að hafa afleiðingar


Sem fyrr segir skiptir niðurstaða þessa máls gríðarmiklu máli fyrir fjölda fólks, bæði fyrir þau sem unnu hjá Vietnam Restaurant og fyrir starfsfólk annarra fyrirtækja Quang Lé, þar sem svipaður háttur virðist hafa verið hafður á í öllum hans rekstri. Að starfsfólk hafi verið látið vinna óheyrilega mikið, fengið lítið frí, og ekki fengið greitt sem skyldi. 


Gerðar hafa verið viðlíka kröfur fyrir hönd fyrrverandi starfsfólks í öllum hinum gjaldþrota fyrirtækjum Quang Lé en skiptastjórar þeirra hafa almennt hafnað þeim með vísan til þess að engin gögn séu til staðar um hina ógreiddu yfirvinnu. Ætla má að dómurinn hafi fordæmisgildi og leiði til þess að þrotabúin samþykki réttmætar kröfur starfsfólksins fyrrverandi. 


Efling fagnar því mjög að réttlætið hafi sigrað í Landsdómi. Launaþjófnaður er ólíðandi og á að hafa afleiðingar, líka þegar þrotabú eru gerð upp. 

Eftir Ísak Jónsson • 19. nóvember 2026
Efling is hosting a film screening for its members on Wednesday, 25 November. The comedy Triangle of Sadness will be shown at Bíó Paradís at 6:45 PM. Triangle of Sadness follows a model couple whose glamorous life leads them onto a luxury cruise for the ultra‑rich, where social status games and absurd elitism dominate. A sudden disaster forces survivors onto a deserted island, stripping away privilege and exposing the fragility of power. The film won the prestigious Palme d'Or at the 2022 Cannes Film Festival. Each ticket costs 500 ISK and includes popcorn and a soft drink or juice. A maximum of five tickets may be purchased per member. You buy the ticket on the Efling my pages here .
Eftir Ísak Jónsson • 19. nóvember 2026
Efling stendur fyrir bíósýningu fyrir félagsmenn sína miðvikudaginn 25. nóvember. Sýnd verður grínmyndin Triangle of Sadness í Bíó Paradís kl. 18:45. Triangle of Sadness fjallar um fyrirsætupar sem lifir glamúrlífi. Þau fara í lúxussiglingu fyrir ofurríka, þar sem félagsleg staða, völd og fáránlegt snobb ráða ríkjum. Þegar skyndilegt áfall verður neyðast eftirlifendur til að bjarga sér á eyðieyju, þar sem forréttindi þeirra missa gildi sitt og brothætt eðli valds og stéttaskiptingar kemur í ljós. Myndin hlaut hinn eftirsótta gullpálma á Cannes kvikmyndahátíðinni árið 2022. Miðinn kostar 500kr. og innifalið er popp og gos eða djús. Hámark 5 miðar fyrir hvern félagsmann. Þú kaupir miðann á mínum eflingar hér .
Eftir Sunna Björg Gunnarsdóttir • 18. nóvember 2026
The December bonus for 2026 is due soon.
Sýna fleiri fréttir