Eflingarþing haldið í fyrsta sinn 26.–27. febrúar

Efling stéttarfélag heldur í fyrsta sinn Eflingarþing dagana 26. og 27. febrúar í Austurbæjarbíói. Þingið er nýr og öflugur vettvangur þar sem félagsfólk kemur saman til að móta stefnu og efla baráttu fyrir bættum kjörum og réttindum launafólks.

Yfir 200 Eflingarfélagar, frá rúmlega 30 mismunandi upprunalöndum, taka þátt í þinginu. Þeir endurspegla þann fjölbreytta hóp launafólks sem Eflingu skipa, og gegna lykilhlutverki í að móta sameiginlega sýn og kröfur félagsins.

Markmið þingsins er að styrkja rödd Eflingar, dýpka umræðu um brýn hagsmunamál og auka virkni félagsfólks í starfi félagsins. Ályktanir þingsins munu marka skýra stefnu í baráttumálum Eflingar á komandi misserum, byggðar á vinnu trúnaðarráðs og reynslu félagsfólks á vinnumarkaði.

Dagskráin spannar tvo daga og samanstendur af fyrirlestrum, umræðum og vinnulotum þar sem þingfulltrúar vinna markvisst að tillögum og ályktunum. Sólveig Anna Jónsdóttir, formaður Eflingar, flytur setningarávarp.

Meðal fyrirlesara eru Ragnar Þór Ingólfsson, félags- og húsnæðismálaráðherra, og Jónas Atli Gunnarsson, yfirhagfræðingur Húsnæðis og mannvirkjastofnunar. Þá taka einnig til máls erlendir gestir sem fjalla um baráttu launafólks á alþjóðavettvangi, þar á meðal Lars Christian Fjeldstad frá norska alþýðusambandinu LO og Anna Bacia, formaður stéttarfélags umönnunarstarfsfólks í Póllandi.