Stjórn Eflingar fordæmir framgöngu Bandaríkjanna

Leigjendasamtökin standa fyrir pallborðsumræðum um húsnæðismál 2. maí næstkomandi, í fyrirlestrasal Grósku, frá klukkan 15:00 til 17:00. Oddvitum framboðanna í Reykjavík er boðið í pallborðið til að svara spurningum um stefnu framboðanna í þessum mikilvæga málaflokki fyrir borgarstjórnarkosningar 16. maí. Viðburðurinn er opinn almenningi. Ragnar Þór Ingólfsson, ráðherra húsnæðismála, mun flytja opnunarerindi og fara yfir hvernig samstarf ríkis og sveitarfélaga hefur áður leyst húsnæðiskreppur. Spyrlar verða Guðmundur Hrafn Arngrímsson og Sigurður Stefánsson. Áætlað er að viðburðurinn standi í um tvær klukkustundir og hann verður tekinn upp og áætlað að honum verði streymt á Vísi.

Skrifstofa Eflingar stéttarfélags lokar fyrr en vanalega í dag, miðvikudaginn 22. apríl, vegna starfsmannafundar. Skrifstofan lokar klukkan 14:00 í dag. Hægt er að senda erindi með tölvupósti og verður þeim svarað við fyrsta tækifæri.  Rétt er að minna á að skrifstofa Eflingar verður lokuð á morgun, 23. apríl, sumardaginn fyrsta. Opnað verður aftur á hefðbundnum opnartíma, klukkan 9:00, á föstudagsmorgun.

Stjórn Eflingar stéttarfélags hefur sent stjórnvöldum tillögur sínar um upptöku leigubremsu. Tillögurnar hafa verið senda Kristrúnu Frostadóttur forsætisráðherra, Ragnari Þór Ingólfssyni félags- og húsnæðismálaráðherra, og til nefndarmanna í velferðarnefnd Alþingis. Með upptöku leigubremsu á íslenskum leigumarkaði má draga hratt úr verðbólgu, verðbólguvæntingum og vaxtastigi. Leiguverð á íslenskum leigumarkaði hefur hækkað mun meira hér á landi en í grannríkjum, sem hefur gert leigu að sérstökum drifkrafti verðbólgu á Íslandi. Tillögur Eflingar fela meðal annars í sér bann við mánaðarlegum hækkunum leigu, að árlegar hækkanir verði bundnar við vísitölu neysluverðs án húsnæðisliðar, auk þess sem settar verði skýrari skorður við ákvörðun markaðsleigu, sem og að eftirlit verði eflt. Efling bendir á að sambærilegar aðgerðir hafa gefið góða raun erlendis og vísar sérstaklega til Danmerkur, þar sem tímabundið þak á leiguhækkanir hefur stuðlað að hraðari lækkun verðbólgu en ella. Að mati Eflingar myndi innleiðing leigubremsu vera bæði skjótvirk aðgerð gegn verðbólgu og mikilvæg kjarabót fyrir leigjendur, sérstaklega ungt og tekjulægra fólk. Félagið skorar á stjórnvöld að grípa tafarlaust til aðgerða. Leigubremsa lækkar verðbólguna Tillögur stjórnar Eflingar stéttarfélags til stjórnvalda 1. Íslenskur leigumarkaður er afbrigðilegur Á íslenska leigumarkaðinum eru minni hömlur á hækkun leigu en í nær öllum grannríkjunum. Þetta hefur leitt til þess að leiga íbúðarhúsnæðis hefur hækkað mun meira á Íslandi en víðast hvar í Evrópu. Leiga hefur t.d. hækkað þrisvar sinnum meira á Íslandi en á hinum Norðurlöndunum að meðaltali á síðasta áratug. Leiga á Íslandi hefur ekki bara hækkað mánaðarlega heldur hefur árleg hækkun leigu verið um þrisvar sinnum meiri en hækkun verðlagsvísitölu Hagstofunnar (VNV). Þannig hefur leiguverð verið sérstakur drifkraftur verðbólgunnar í landinu. Þetta gildir bæði um leigu fyrir íbúðarhúsnæði og atvinnuhúsnæði fyrirtækja. Það er því gríðarlega mikið hagsmunamál fyrir samfélagið og verkafólk sérstaklega að færa skipan leigumarkaðarins hér til sambærilegs horfs og tíðkast í flestum grannríkjanna. Þetta gæti verið stórt og skjótvirkt skref í baráttunni við að lækka verðbólgu, verðbólguvæntingar og vaxtastigið í landinu. 2. Tillögur Eflingar Efling leggur til við stjórnvöld að tekið verði fast og snarlega á þessum málum. Tillögur Eflingar, sem eru byggðar á reynslu OECD-ríkjanna, ná til fimm mikilvægra þátta, sem allir þurfa að skila sér til að árangur náist. Tillögurnar eru eftirfarandi: 1. Banna mánaðarlegar hækkanir leigu . Í staðinn komi árlegar hækkanir, m.v. upphafstíma leigusamnings (eins og víða tíðkast) 2. Þetta gildi bæði fyrir útleigu á íbúðarhúsnæði og atvinnuhúsnæði 3. Árlegar hækkanir leigu á almennum markaði verði ekki meiri en nemur hækkun vísitölu neysluverðs án húsnæðisliðar . Þetta verði fyrst um sinn í gildi út samningstíma kjarasamninga (þ.e. til 2028). Með þessu yrði dregið úr víxlverkun milli þenslu á húsnæðismarkaði og almenns verðlags. 4. Takmarkanir verði settar við ákvörðun leigu við upphaf eða endurnýjun leigusamnings , þannig að leiga sé ekki hærri en fyrir sambærilegt húsnæði á markaði á þeim tíma (þetta er svipað og tíðkast í Noregi, Danmörku, Svíþjóð, Þýskalandi og víðar). Hagstofan birti reglulega upphæð meðalleigu eftir tegundum húsnæðis og staðsetningu , sem verði leiðbeinandi viðmið við gerð leigusamninga. 5. Aukið verði eftirlit HMS með þróun markaðsleigu og neytendavernd leigjenda verði einnig efld. Félags- og húsnæðismálaráðherra hefur lýst áformum sínum um að banna mánaðarlegar hækkanir leigu og er það gott fyrsta skref. En öll hin skrefin þarf einnig að stíga til fulls til að ná nægum árangri í baráttunni við verðbólguna og lækkun vaxta. Þetta er það sem þarf til að koma íslenskum leigumarkaði í sambærilegt horf og tíðkast víða í grannríkjunum. Þetta er líka mikið kjaramál fyrir verkafólk, einkum þau yngri og tekjulægri, sem eru almennt fastari í leiguhúsnæði en aðrir þjóðfélagshópar, en hátt í 30% íbúa landsins búa nú í leiguhúsnæði. 3. Fordæmi Dana Þegar verðbólga hækkaði úr 1,9% í um 8% í Danmörku, í kjölfar innrásar Rússa í Úkraínu árið 2022, setti ríkisstjórn Mettu Fredriksen tímabundið þak á árshækkun leigu við 4%, eða um helming af því sem verðbólgustigið var þá. Þetta gilti í 2 ár. Verðbólgan lækkaði niður í um 3% strax árið eftir. Leigubremsa getur þannig verið mjög skjótvirkur og öflugur hemill á almennar verðhækkanir. 4. Almenn rök og gögn Íslenski leigumarkaðurinn er lausari við hömlur á hækkun leigu en tíðkast í grannríkjunum. Einungis 3 af 29 aðildarríkjum OECD eru með minni takmarkanir á hækkun leigu en Ísland (sjá mynd 1 í Viðauka). Meira að segja Bandaríkin setja meiri hindranir við hækkun leigu en Ísland. Ísland á í reynd met í afskiptaleysi stjórnvalda af leigumarkaði. Það hefur því verið óvenju auðvelt fyrir íslenska leigusala að hækka leigu umfram það sem verið hefur í grannríkjunum, bæði fyrir íbúðir og atvinnuhúsnæði. Eins og við er að búast hefur það skilað sér í miklu meiri hækkunum leigu hér á landi (sjá mynd 2 í Viðauka). Íbúðaleiga hefur t.d. hækkað um þrisvar sinnum meira á Íslandi en á hinum Norðurlöndunum á tímabilinu frá 2015 til 2024 (sjá mynd 3 í Viðauka). Leigan hér hefur hækkað langt umfram almennar verðhækkanir á neysluvöru (VNV vísitölunni) og því er leigan almennt sjálfstæður drifkraftur verðbólgunnar. Mánaðarlegar hækkanir leigu þýða að leiga er leiðandi í verðbólguþrýstingi (umsamin laun og opinber gjöld hækka almennt ekki mánaðarlega, heldur árlega). Síðan fer hækkun leigu inn í verðbólgumælinguna – og verður þá aftur tilefni til frekari hækkana leigu, í verðbólguhvetjandi víxlverkun hækkana. Tíðar hækkanir á útleigu atvinnuhúsnæðis til fyrirtækja fara beint út í verðlagið. Þetta er algerlega óviðunandi fyrirkomulag, sem á stóran þátt í þrálátri verðbólgu hér á landi og háu vaxtastigi. Helsta leið verkalýðshreyfingarinnar til að verja launafólk gegn óhóflegum hækkunum leigu og íbúðaverðs, sem og vegna verðhækkana á nauðsynjum, er að reyna að láta launin halda í við þessar kostnaðarhækkanir. Ef leiga og íbúðaverð hækkar langt umfram kaupmátt launafólks leiðir það til meiri launahækkana en ella í framhaldinu. Breiðfylking launþegafélaga freistaði þess í kjarasamningunum 2024 að ná fram þjóðarsátt um lækkun verðbólgu og vaxta, með hóflegri hækkun launa til fjögurra ára, í reynd með minni árlegar hækkanir en nam verðbólgunni við upphaf samningstímans. Nú er komið að leigusölum að sýna álíka aðhald til að draga úr verðbólguþrýstingi frá leigumarkaðinum. Leigusalar græða á tvo vegu: með óhóflegri hækkun leigu og með óvenju mikilli hækkun íbúðaverðs, sem eykur eigið fé leigusalanna í leiguíbúðunum. Þetta er tvöföld hagnaðarmylla. Leigusalar hafa þannig búið við gríðarlegan hagnað af starfsemi sinni á síðustu árum. Leigufélög á almennum markaði hafa jafnvel verið með hærra hlutfall hagnaðar af veltu en bankarnir (sjá mynd 5 í Viðauka). Sama aðhald þyrfti einnig að gilda um verð íbúða og annarrar nauðsynjavöru, sem og um opinberar gjaldtökur. Þjóðarsátt um að ná fljótlega markmiði Seðlabankans um 2,5% verðbólgu ætti þá að þýða að leigusalar, íbúðasalar, opinberir aðilar og seljendur vöru og þjónustu takmarki árlegar hækkanir sínar við 2,5% út samningstímabilið til 2028. Vegna mikillar hættu á meiri hækkun innflutningsverðs á næstunni mætti þó takmarka hækkanir við verðlagsvísitölu án húsnæðisliðar á tímabilinu. Það ætti að tryggja viðunandi rekstrarafkomu leigusala, þ.e. í takti við aðra starfsemi í viðskiptahagkerfinu. Hverju gæti leigubremsa skilað á Íslandi núna? Eftir methækkanir á bæði leigu og íbúðaverði síðustu 10-15 árin er verðlag á húsnæði á Íslandi orðið alltof hátt, hvort sem er til kaupa eða leigu. Ungt fólk þarf að skuldsetja sig óheyrilega til að eignast íbúð og leigjendur eiga sífellt erfiðara með að safna fyrir útborgun í íbúð. Sífellt fer fækkandi þeim sem ráða við greiðslubyrði lána sem til þarf, sérstaklega eftir að bankarnir hafa nýlega þrengt enn meira að lánakjörum íbúðalána. Beinar lækkanir á þessum húsnæðiskostnaði, sem ráðast meðal annars af samspili framboðs og eftirspurnar, þyrftu að koma til. En það tekur lengri tíma. Nú er hins vegar hægt að grípa í taumana og hemja hinn taumlausa leigumarkað til að byrja með. Það myndi tryggja að staðan haldi ekki áfram að versna, heldur myndi batna með hægfara aðlögun. Verðbólguþrýstingur myndi minnka. Þetta myndi fela í sér kjarabót fyrir leigjendur almennt og sérstaklega ungt fólk með lægri og milli tekjur. Á mynd 4 í viðauka má sjá hver áhrif aðgerða sem Efling leggur nú til hefðu verið ef þeim hefði verið beitt á leiguverð frá 2011 til 2025. Þar kemur fram að húsnæði sem var leigt á 100 þúsund kr. á mánuði á árinu 2011 er í dag leigt á um 300 þúsund krónur (samkvæmt framreikningi m.v. leiguvísitölu HMS). Leigan hefur þrefaldast. Ef leiga hefði einungis hækkað með árlegri tengingu við verðlagsvísitölu Hagstofunnar (VNV) þá væri leigan fyrir samsvarandi húsnæði í dag tæpar 173 þúsund krónur á mánuði. Ef tengt hefði verið við verðlagsvísitölu án húsnæðisliðarins (sem væri eðlilegast) þá væri leigan fyrir sama húsnæði um 146 þúsund krónur í dag, en ekki um 300 þúsund krónur. Leigan væri um helmingi lægri. Slíkar takmarkanir á hækkun leigu myndu stöðva sjálfstæð hækkunaráhrif leigu á verðbólguna, lækka verðbólguvæntingar hratt og styrkja stöðugleika í efnahagslífinu. Þetta væri einnig mikið kjaraatriði fyrir leigjendur, sem eru nú hátt í 30% íbúa í landinu og oft þeir tekjulægstu. Innleiðing hóflegrar leigubremsu, eins og Efling leggur til, kostar ríkið engin auka útgjöld, heldur getur hún bætt afkomu hins opinbera sem er oft í stöðu leigjanda. Hægt er að innleiða leigubremsu á skjótvirkan hátt, eins og reynsla Dana sýnir. Efling skorar því á stjórnvöld að taka nú fljótt og vel í leigubremsuna. ______________________________________________________________________________ Viðauki: Gögn um reglun á leigumarkaði og hækkanir leigu

Sunnudaginn 10. maí verður haldið glæsilegt kaffiboð fyrir Eflingarfélaga 67 ára og eldri. Boðið verður í fallegum sal í Gullhömrum í Grafarholti og hefst klukkan 14:30. Húsað opnar fyrir gestum klukkan 14:00. Efling stéttarfélag býður gestum upp á kaffi og veitingar auk þess sem hljómsveit spilar fyrir dansi. Hverjum Eflingarfélaga er velkomið að bjóða einum gesti með sér. Miðar á boðið eru ókeypis en sækja þarf þá á skrifstofu Eflingar í Guðrúnartúni 1. Hægt er að nálgast miða frá miðvikudeginum 22. apríl til og með föstudeginum 8. maí. Fjöldi sæta er takmarkaður og því gildir sú regla að fyrstir koma, fyrstir fá.

Athugið! Uppselt er á fjölskylduhátíð Eflingar á baráttudegi verkalýsðins, 1. maí. Þeir Eflingarfélagar sem keypt hafa miða eru vinsamlega minntir á að koma og sækja armbönd sem gilda sem aðgöngumiði að hátíðinni fyrir 30. apríl . Efling stéttarfélag blæs til mikillar fjölskylduhátíðar fyrir félagsfólk sitt á baráttudegi verkalýðsins, 1. maí næstkomandi. Hátíðin verður haldin í Hvalasafninu/Whales of Iceland að Fiskislóð 23-25 í Reykjavík og hefst klukkan 15:00, að lokinni kröfugöngu og útifundi í miðborginni. Boðið verður upp á fjölbreytt úrval veitinga en eftirfarandi veitingar verða í boði: Pítsur Hamborgarar DonsDonuts kleinuhringir Ís Kandífloss Popp Kaffi og kökur Þá verður skemmtunin ekki af verri endanum. Hér að neðan má sjá það helsta en upptalningin er þó alls ekki tæmandi: Dj Sunna Ben heldur uppi stuðinu Lúðrasveit verkalýðsins spilar fyrir gesti Ótrúleg sirkusatriði Blaðrarinn kemur og blaðrar Andlitsmálning fyrir börnin Myndabás Miðinn á fjölskylduskemmtunina kostar aðeins 500 krónur og allt er innifalið í verði. Hver Eflingarfélagi getur keypt allt að fimm miða. Miðasala fer fram í vefverslun Eflingar á Mínum síðum og hefst 17. apríl. Sækja þarf armbönd sem veita aðgang að skemmtuninni á skrifstofu Eflingar í Guðrúnartúni 1, fyrir 30. apríl. Fyrstir koma, fyrstir fá.

Trúnaðarráð Eflingar fylgist náið með viðbrögðum stjórnvalda við efnahagsástandinu. Fundur trúnaðarráðs stóð yfir þegar tilkynnt var um fjölmiðlafund ríkisstjórnarinnar á morgun föstudag. Á fundinum samþykkti Trúnaðarráð að hefja undirbúning að stofnun samninganefndar, sem fari með samningsumboð félagsins ef til nýrra kjaraviðræðna kemur með haustinu í kjölfar hugsanlegrar uppsagnar kjarasamninga. Af þessu tilefni vill Trúnaðarráð minna á eftirfarandi: Eflingarfélagar ásamt Breiðfylkingunni sýndu mikið hugrekki í kjaraviðræðunum veturinn 2023-2024 og studdu ábyrga kjarasamningagerð þar sem varnir gegn verðbólgu voru ein meginstoðin. Í dag er komin upp sú staða að Eflingarfélagar, verka- og láglaunafólk Höfuðborgarsvæðisins, bera þyngstar byrðar af efnahagsástandi sem komið er úr böndunum. Breiðu bökin þola hávaxtastig og verðbólgu, en það gera tekjulág heimili ekki. Trúnaðarráð Eflingar krefst þess að félagið fái beina aðkomu að þeim viðræðum og ákvarðanatöku sem fram undan er til að bregðast við þessu ástandi. Trúnaðarráð bendir á að á nýafstöðnu Eflingarþingi voru samþykktar fjórar ályktanir með útfærðum tillögum um úrbótamál. Engin þeirra kostar ríkissjóð krónu. Má þar nefna leigubremsu, viðurlög við launaþjófnaði og kröfu um málefnalegar ástæður fyrir uppsögnum verkafólks á almennum vinnumarkaði. Trúnaðarráð skorar á stjórnvöld að hlusta á raddir verka- og láglaunafólks, koma til móts við málefnalegar kröfur með afgerandi hætti og forða því að með haustinu skapist átök á vinnumarkaði sem koma hefði mátt í veg fyrir.

Samtök evrópskra verkalýðshreyfinga og samtök evrópskra atvinnurekenda í greinum þar sem verkafólk starfar við ræstingar, í veitinga- og mötuneytisgeiranum, við öryggisþjónustu og fasteignaþjónustu, í matvælageiranum, ferðaþjónustu og landbúnaði, hafa sent frá sér sameiginlega yfirlýsingu þar sem kallað er eftir róttækum breytingum á reglum Evrópusambandsins um opinber innkaup. Yfirlýsingin er undirrituð af FoodServiceEurope, EFCI, CoESS, EFFAT og UNI Europa Property Services. Um er að ræða bæði samtök atvinnurekenda og samtök verkalýðshreyfinga í Evrópu. Efling er aðili að UNI Global Union, alþjóðlegum regnhlífarsamtökum verkalýðshreyfinga, sem UNI Europa er hluti af. Yfirlýsingin er viðbragð við yfirstandandi endurskoðun á tilskipun Evrópusambandsins varðandi reglur um opinber innkaup og var send inn í samráðsferli framkvæmdastjórnar sambandsins í lok janúar síðastliðins. Með yfirlýsingunni vonast umrædd samtök tilraun til að hafa áhrif á verðandi nýja löggjöf Evrópusambandsins. Útboð á kostnað verkafólks Í yfirlýsingunni er dregin upp skýr mynd af alvarlegum veikleikum í núgildandii regluverki. Opinber innkaup, sem eiga að tryggja gæði og ábyrgð í þjónustu við almenning, byggjast í raun of oft á því einu að velja lægsta verðið. Afleiðingin er hörð samkeppni á kostnað verkafólks, þar sem fyrirtæki keppa um að bjóða sem lægst í verk. Oft eru slík tilboð langt undir raunverulegum kostnaði. Samkvæmt gögnum frá Evrópusambandinu eru um tveir þriðju opinberra samninga af þessu tagi án nokkurra skilyrða um félagslega ábyrgð. Það þýðir að í meirihluta tilvika er ekki tryggt að fyrirtæki sem hljóa samninga við opinbera aðila virði kjarasamninga eða bjóði mannsæmandi vinnuaðstæður. Þetta veikir kjarasamninga og ýtir undir undirboð og lakari þjónustu. Þessi þróun er vel þekkt hér á landi og snertir félagsfólk Eflingar með beinum hætti. Í ræstingum, mötuneytum og annarri þjónustu þar sem launakostnaður er stærsti útgjaldaliðurinn hefur samkeppni í útboðum ítrekað leitt til þrýstings niður á við þegar kemur að launakjörum og vinnuaðstæðum. Núverandi regluverk hvetur einfaldlega til þess. Hefði áhrif á Íslandi Verði tekið tillit til ábendinganna sem settar eru fram í yfirlýsingunn mun það skipta félagsfólk Eflingar verulegu máli, sökum aðildar Íslands að EES-samningnum. Reglur Evrópusambandsins um opinber innkaup eru hluti af EES-regluverkinu og hafa því bein áhrif hér á landi. Breytingar sem verða samþykktar innan ESB á þessu sviði munu því, með einum eða öðrum hætti, rata inn í íslenskan rétt. Þróunin í Evrópu mótar þannig leikreglurnar sem gilda líka fyrir íslenskt vinnumarkaðsumhverfi. Í yfirlýsingunni er bent á að skortur á skýrum reglum sem hamli „óeðlilega lágum tilboðum“ geri fyrirtækjum kleift að bjóða undir kostnaði til að ná samningum. Eina leiðin til að fyrirtæki sem hljóta slíka samninga sjái sér hag í því er með lækkun launa, jafnvel með brotum gegn ákvæðum kjarasamninga, eða með því að verkefni séu sett á hendur alltof fárra starfsmanna sem vinni við ólíðandi starfsskilyrði. Þá er gagnrýnt að samningar taki oft ekki mið af launahækkunum, verðbólgu eða hækkandi kostnaði við rekstur. Fyrirtæki sem hlotið hafa umrædda samninga eigi því aðeins tvo kosti, þau neyðast annað hvort til að taka kostnaðarhækkanir á sig eða skera niður annars staðar. Slíkt bitnar fyrst og fremst á starfsfólki og gæðum þjónustunnar. Samtökin leggja fram skýrar kröfur um breytingar. Sett verði þau skilyrði fyrir þátttöku í opinberum útboðum að fyrirtæki virði kjarasamninga Óheimilt verði að taka tilboðum eingöngu á grundvelli verðs Gæði þjónustu og vinnuaðstæður verkafólks vegi þyngra við val á tilboðum Sett verði skýr skilgreining á hvað séu óeðlilega lág tilboð Tryggt verði að samningar taki mið af launahækkunum og verðbólgu Í yfirlýsingunni er einnig lögð áhersla á að aukið samtal eigi sér stað milli opinberra kaupenda og aðila vinnumarkaðarins áður en útboð hefjast, svo tryggja megi raunhæf skilyrði og gæði þjónustunnar. Staðan er alvarleg Það sem gerir þessa yfirlýsingu sérstaklega athyglisverða er að hún er sameiginleg afstaða bæði stéttarfélaga og atvinnurekenda. Slík samstaða undirstrikar hversu alvarleg staðan er orðin. Þegar báðir aðilar vinnumarkaðarins kalla eftir sömu breytingum er ljóst að kerfið er ekki að virka. Fyrir Eflingu eru þetta lykilmál. Núverandi fyrirkomulag í opinberum útboðum ýtir undir undirboð, veikir kjarasamninga og grefur undan réttindum félagsfólks. Breytingar á umræddum reglum um útboð gætu hins vegar haft veruleg áhrif til hins betra, með því að styrkja réttindi launafólks, bæta vinnuaðstæður og tryggja betri og öruggari þjónustu fyrir almenning.  Baráttan fyrir réttlátum útboðum er því ekki bara tæknilegt mál innan Evrópusambandsins, heldur beinlínis kjaramál fyrir félagsfólk Eflingar.

Aðalfundur Eflingar stéttarfélags fór fram á Hilton Reykjavík Nordica í gær, 26. mars, og var vel sóttur af félagsfólki. Í ávarpi sínu undir liðnum skýrsla stjórnar fór Sólveig Anna Jónsdóttir, formaður Eflingar, vítt yfir sviðið og lagði áherslu á að baráttu Eflingarfélaga væri hvergi nærri lokið, raunar lyki henni aldrei. „Við höfum náð árangri – og við eigum að vera stolt af því sem við höfum áorkað saman. En á sama tíma verðum við að horfast í augu við þau fjölmörgu vandamál sem enn eru óleyst,“ sagði hún. Sólveig Anna gagnrýndi harðlega stöðu húsnæðismála og áhrif hávaxtastefnu á verkafólk. Benti hún á að stór hluti félagsfólks neyddist til að verja meirihluta tekna sinna í húsnæðiskostnað og við það yrði ekki búið. „Við höfum hafnað þeirri hugmynd að við getum beðið eftir réttlæti. Við verðum að sækja það sjálf,“ sagði Sólveig Anna og lagði áherslu á mikilvægi samstöðu og sjálfstæðrar röddar verkafólks. Þá varaði hún við fyrirhuguðum breytingum á atvinnuleysistryggingum og sagði þær senda „ömurleg skilaboð“ til þeirra sem mest þurfa á stuðningi að halda. Einnig gagnrýndi hún skort á viðurlögum við kjarasamningsbrotum og kallaði eftir lagasetningu gegn launaþjófnaði. Í lok ávarps síns lagði hún áherslu á að þolinmæði verkafólks væri á þrotum ef ekki kæmu fram raunverulegar aðgerðir. „Annað hvort hlusta atvinnurekendur og stjórnvöld á okkar kröfur og bregðast við með raunverulegum aðgerðum – eða afleiðingarnar verða alvarlegar strax í haust.“ Sterk fjárhagsstaða og vöxtur  Perla Ösp Ásgeirsdóttir, framkvæmdastjóri Eflingar, kynnti reikninga félagsins sem sýna afar sterka stöðu. Tekjur jukust um tæp 16% milli ára og námu rúmum 4,2 milljörðum króna. Afkoma batnaði verulega og rekstrarniðurstaða ársins nam 722 milljónum króna. Heildareignir félagsins jukust um tæplega 1,5 milljarða króna og eigið fé stendur nú í um 17,6 milljörðum króna. Þá var farið yfir að kostnaður hefði hækkað minna en áætlað var og rekstur félagsins einkennst af aðhaldi og ábyrgð. Í máli Perlu ko m fram að lögð hefði verið rík áhersla á að efla þjónustu við félagsfólk og byggja upp innviði til framtíðar, meðal annars með fjárfestingum í húsnæði, upplýsingatækni og orlofshúsum. Kjöri stjórnar lýst Þórir Jóhannesson, varaformaður Eflingar, kynnti niðurstöðu uppstillingarnefndar. Þar sem ekki bárust mótframboð var stjórn félagsins sjálfkjörin. Stjórn Eflingar er nú skipuð eftirfarandi: Formaður: Sólveig Anna Jónsdóttir Varaformaður: Þórir Jóhannesson Ritari: Guðmunda Valdís Helgadóttir Gjaldkeri: Michael Bragi Whalley Meðstjórnendur: Alexa Tracia Patrizi Gréta Íris Karlsdóttir Hjördís Bech Ásgeirsdóttir Hjörtur Birgir Jóhönnuson Hlynur Gauti Ómarsson Ian Phillip McDonald Karla Esperanza Barrlaga Ocon Mary Jane Gonzales Munoz Rögnvaldur Ómar Reynisson Sigurjón Ármann Björnsson Sæþór Benjamín Randalsson Þakkir til fráfarandi stjórnarmanna Á fundinum voru jafnframt kvaddir fráfarandi stjórnarmenn, þær Guðbjörg María Jósepsdóttir, Innocentia Fiati og Olga Leonsdóttir. Þeim voru færðar þakkir fyrir störf sín og var þeim fagnað með dynjandi lófataki, þar sem fundargestir risu úr sætum til að þakka fyrir störf þeirra. Lagabreytingar samþykktar Tillögur að lagabreytingum voru einnig lagðar fram á fundinum. Þær lutu að sameiningu tveggja sjóða innan félagsins og voru samþykktar samhljóða án athugasemda. Aðalfundurinn staðfesti þannig bæði sterka fjárhagsstöðu Eflingar og skýra stefnu í kjarabaráttu, þar sem áhersla er lögð á aukin réttindi verkafólks og harðari viðbrögð við þeim áskorunum sem blasa við á vinnumarkaði og húsnæðismarkaði.

Vegna illviðris sem gengur yfir höfuðborgarsvæðið, og víðar, má búast við skertri þjónustu á skrifstofu Eflingar í Guðrúnartúni 1. Símsvörun verður með venjubundnum hætti og erindum sem send eru með tölvupósti verður svarað. Appelsínugul viðvörun er í gildi á höfuðborgarsvæðinu, Suður- og Suðvesturlandi. Gangi veðurspár eftir má búast við að vonskuveðri fram yfir hádegi. Helstu leiðir til og frá höfuðborgarsvæðinu eru lokaðar. Almannavarnir á höfuðborgarsvæðinu hafa brýnt fyrir fólki að halda sig heima og vera ekki á ferðinni enema brýna nauðsyn beri til. Þá hefur skólahaldi í grunn- og leikskólum í einhverjum tilvikum verið aflýst en tilkynnt var í gærkvöldi að lágmarksmönnun yrði í öllum grunnskólum Reykjavíkurborgar. Þetta gerir það að verkum að hluti starfsfólks skrifstofu Eflingar á óhægt með að komast til vinnu, ýmist vegna veðurs og færðar eða vegna þess að það þarf að sinna ungum börnum sínum sem ekki komast til skóla. Þar af leiðandi verður ekki hægt að halda uppi fullri þjónustu í Guðrúnartúni 1. Efling hvetur félagsfólk sitt til að vera ekki á ferðinni að óþörfu og sé það tilneytt til þess, að fara þá varlega. Að óbreyttu verður full starfsemi á skrifstofu félagsins í Guðrúnartúni á morgun, föstudaginn 27. mars. Rétt er þó að benda á að skrifstofan opnar síðar en venjulega á morgun, eða klukkan 10:00, vegna starfsmannafundar.